Սարի թաղի բնակիչներն այսօր՝ հոկտեմբերի 19–ին, բողոքի ակցիա են արել Բաղրամյան 26-ի դիմաց: NEWS.am-ի թղթակիցն հաղորդում է, որ նրանք պահանջում են ազատ արձակել իրենց հարազատներին, որոնք կալանավորված են հուլիսի 19–ի դեպքերով հարուցված քրեական գործի շրջանակում։ Բողոքող քաղաքացիներին ընդունել է նախագահական նստավայրի նամակների բաժնի պետը եւ հորդորել նրանց սպասել մինչեւ հոկտեմբերի 21-ը, մինչեւ այդ գործով դատական նիստը կկայանա:
Կալանավորվածների հարազատները հոկտեմբերի 20-ին եւս պատրաստվում են Բաղրամյան 26-ի դիմաց բողոքի ակցիա իրականացնել՝ նույն պահանջով:
Ըստ մեղադրական եզրակացության՝ Սարի թաղի բնակիչներ Հարություն Թորոսյանը, Հրայր Իսախանյանը, Անդրանիկ Քյոսեյանն ու Էդուարդ Զեյթունյանը սույն թվականի հուլիսի 19-ին ժամը 20.00-ի սահմանում Մովսես Խորենացի փողոցին հարող` Գլինկա եւ Որմնադիրների փողոցների հատման վայրում մի խումբ անձանց հետ, առողջության համար վտանգավոր բռնություն են գործադրել իրենց ծառայողական պարտականությունները կատարող, իշխանության ներկայացուցիչ համարվող ՀՀ ոստիկանության մի շարք ծառայողների նկատմամբ:
Նրանց մեղադրանք է առաջադրվել Քրեական օրենսգրքի 316-րդ հոդվածի 2-րդ մասով: Բոլորն էլ կալանավորված են:
