Հայաստանում կկարգավորեն ռադիոակտիվ հանքերի հետազոտության եւ արդյունահանման թույլտվություն տրամադրելու կարգը: «Ընդերքի մասին» օրենքում համապատասխան փոփոխությունների նախագիծը հոկտեմբերի 19-ին Հայաստանի խորհրդարանում ներկայացրել է էներգետիկ ենթակառուցվածքների եւ բնական պաշարների փոխնախարար Վարդան Գեւորգյանը:
Օրինագծի համաձայն՝ ռադիոակտիվ նյութերի երկրաբանական հետազոտության իրավունք կտրամադրվի մրցութային կարգով: Դա թույլ կտա հաշվի առնել արդյունահանող ընկերությունների ուժեղ եւ թույլ կողմերը՝ երկրաբանական հետազոտության ոլորտում փորձը, ներդրումային ծրագիրը, աշխատատեղերի ստեղծումը, անվտանգության միջոցառումները, աշխատակիցների որակավորումը:
NEWS.am-ի թղթակցի հետ զրույցում փոխնախարարը նշեց, որ 2014 թվականից Հայաստանում ռադիոակտիվ հանքավայրերի հետազոտություն չի կատարվել:
Հիշենենք, որ 2009-2014 թվականներին Սյունիքի մարզի ուրանի հանքերում հետազոտություն էր կատարում «Հայ-ռուսական հանքարդյունաբերական ընկերությունը», որը ստեղծել են Հայաստանի կառավարությունն ու ռուսական «Ռոսատոմ» պետական կորպորացիան: Ընկերությունը հայտնաբերված պաշարների արդյունահանումը տնտեսապես ոչ շահավետ համարեց: