Պենտագոնում մտավախություններ ունեն, որ ԻՊ զինյալները Իրաքի Մոսուլ քաղաքում կարող են տեղի քաղաքացիական բնակչությանն օգտագործել որպես «կենդանի վահան»։ ԱՄՆ ՊՆ ներկայացուցիչ Ջեֆ Դեւիսը հայտնել է, որ իրաքյան բանակի ու միջազգային կոալիցիայի ռազմական գործողությունից մի քանի շաբաթ առաջ ԻՊ-ն թույլ չի տվել, որ բնակիչները հեռանան Մոսուլից։ Քաղաքում հիմա մոտ 1․5 մլն մարդ կա, հայտնում է DW–ն։
Դեւիսի խոսքով, մարդկանց քաղաքում պահում են նրանց կամքին հակառակ, ու ամենայն հավանականությամբ օգտագործում են որպես «կենդանի վահան»։ Նա նաեւ նշել է, որ հիմա էլ ոչ մի տեղեկություն չկա այն մասին, որ բնակիչները հեռանում են Մոսուլից կամ փորձում են փախչել։
Ամերիկացի զինվորականները նաեւ կասկածում են, որ ԻՊ զինյալները քիմիական զենք են գործածում։ ԱՄՆ բանակի ներկայացուցչի խոսքով, զինվորականները Մոսուլի շրջակայքում հավաքում են ԻՊ գործածած լիցքերի բեկորները՝ թունավոր քիմիական տարրերի հետքեր որոնելու նպատակով։ Հոկտեմբերի 5-ին հավաքված բեկորները հաստատել է ծծմբային իպրիտի հետքերի առկայությունը։ Այն ժամանակ ԻՊ-ն այդ լիցքերն օգտագործել էր իրաքյան բանակի դեմ, այլ ոչ թե ամերիկացի զինվորների կամ միջազգային կոալիցիայի ներկայացուցիչների։ Ընդ որում Պենտագոնի ներկայացուցիչները կասկածում են, որ ԻՊ-ն մահացու ազդեցության քիմիական զենք ստեղծելու տեխնիկական հնարավորություններ ունի։