Ադրբեջանի նախագահ Իլհամ Ալիեւի՝ «Ռոսիա սեգոդնյա»-ին տված հարցազրույցում արած հայտարարությունը հակասում է պաշտպանության նախարարի հռետորաբանությանը: Ըստ Vesti.Az-ի՝ նման կարծիք է հայտնել Քարնեգի հիմնադրամի ավագ գիտաշխատող, «Սեւ այգի» գրքի հեղինակ Թոմաս դե Վաալը:
«ԼՂԻՄ-ի կարգավիճակը բարձրացնելու եւ ինքնավար հանրապետության կարգավիճակին հասցնելու գաղափարը 1988 թվականին արդեն քննարկվել, բայց մերժվել է, եւ դժվար է պատկերացնել, որ հիմա այն առավել ընդունելի է»,- ասել է նա:
Բրիտանացի փորձագետը նաեւ հավելել է, որ ավելի շատ տպավորում է Ադբեջանի նախագահի խոսքը չափավոր հնչերանգը, քան դրա բովանդակությունը: «Այն, որ Ալիեւը ճանաչում է Ղարաբաղի հայերի իրավունքները, լավ է, եւ դա հակասում է պաշտպանության նախարարի հռետորաբանությանը»,- ամփոփել է նա:
Հիշեցնենք, որ նշված հարցազրույցում Իլհամ Ալիեւը հայտարարել էր Լեռնային Ղարաբաղին ինքնավարության կարգավիճակ տալու պատրաստակամության մասին: Լեռնային Ղարաբաղում այս հայտարարությունը ծիծաղելի եւ խղճալի են կոչել: