Հաշվի առնելով Արեւմուտքի հետ Թուրքիայի նոր խնդիրները՝ Ռուսաստանը փորձում է Անկարայի հետ հարաբերությունները լավացնել, սակայն Հայաստանին առնչվող խնդրներն անհնար է շրջանցել: Երեւանում Ռուսաստանի ԱԳ նախարար Սերգեյ Լավրովի կատարած՝ Թուրքիայի հնարավոր դերի մասին հայտարարության մեջ այսպիսի ենթատեքստ է նկատել Ռազմավարական ազգային հետազոտությունների հայկական կենտրոնի ղեկավար Մանվել Սարգսյանը: Նա իր տեսակետը հայտնեց «Մեդիա կենտրոնում» կազմակերպված հանդիպմանը:
Մանվել Սարգսյանի կարծիքով՝ Ռուսաստանը փորձում է իր դիրքորոշումը համադրել Թուրքիայի հետ, ըստ որում՝ նրան պարտադրելով իր տեսանկյունը այլ՝ ավելի «կարեւոր» հարցերում: Սարգսյանի կարծիքով՝ երկար տարիներ գերտերություններն ինչ-որ կերպ աջակցել են Հայաստանի այն դիրքորոշմանը, որ Թուրքիայի հետ հարաբերությունները պետք է առանց նախապայմանների կարգավորվեն: Այժմ Լավրովը փաստացի ընդունել է Թուրքիայի դիրքորոշումը, կարծում է Սարգսյանը:
Հակառուսական եզրահանգումները շարունակեց հանդիպման մյուս մասնակիցը՝ «Մոդուս Վիվենդի» վերլուծական կենտրոնի ղեկավար Արա Պապյանը: Նրա կարծիքով՝ Ռուսաստանը հայտնվել է տնտեսական եւ քաղաքական խորը ճգնաժամի շեմին, հետեւաբար ցանկանում է Թուրքիայի հետ հարաբերությունները լավացնել: «Այսինքն՝ շարունակում է Խորհրդային Ռուսաստանի 20-ական թվականների քաղաքականությունը: Իրար են ձգտում երկու մեկուսացված երկրներ: Դա մարտավարական մերձեցում է: Իսկ ռազմավարական առումով Ռուսաստանի համար Թուրքիան շատ վտանգավոր է»,- հայտարարեց Պապյանը:
Նրա կարծիքով՝ ինչպես միշտ, Ռուսաստանը Թուրքիայի հետ հարաբերությունները մեր հաշվին է կարգավորում: «Մեզ համար սա վտանգավոր միտում է, քանի որ ցուցադրում է Ռուսաստանի վրա Թուրքիայի ազդեցության սաստկացում: Ոչ միայն ինքնին Թուրքիայի, այլեւ թուրքական գործոնի: Մեզ դժվար ժամանակներ են սպասում»,- խոստացավ Պապյանը:
Ընդհանուր առմամբ, համաձայնելով Սարգսյանի եւ Պապյանի մտահոգություններին՝ ՀԱԿ արտաքին հարցերի պատասխանատու Վլադիմիր Կարապետյանը հիշեցրեց Թուրքիայի ԱԳ նախարարի հայտարարությունը՝ Ռուսաստանի հետ ձեռք բերած ղարաբաղյան հակամարտության կարգավորմանն առնչվող ինչ-որ համաձայնությունների վերաբերյալ: «Կցանկանայի լսել Ռուսաստանի ԱԳ նախարարության հերքումը»,- նշեց Վլադիմիր Կարապետյանը՝ հավելելով, որ ցանկալի կլիներ, որպեսզի ռուսական կողմի հայտարարություններն ավելի կոնկրետ լինեին:
