Պետական գույքի կառավարման հայկական փորձն ուսանելի է Ղրղզստանի համար: Այս մասին նշվել է Ղրղզստանի պետական գույքի կառավարման հիմնադրամի պատվիրակության ՀՀ ԿԱ պետական գույքի կառավարման վարչություն այցելության ժամանակ:
Ղրղզստանի Հանրապետությունում սեփականաշնորհման ակտիվ շրջան է եւ խիստ արդիական` պետական գույքի հաշվառման բազայի ստեղծումն ու պետական գույքի կառավարման արդյունավետության բարձրացումը` ժամանակակից գործիքների միջոցով:
Երկօրյա աշխատանքային այցով հոկտեմբերի 20-21-ը Հայաստանում է Ղրղզստանի Հանրապետության կառավարությանն առընթեր պետական գույքի կառավարման հիմնադրամի պատվիրակությունը, որի կազմում Ղրղզստանի նախագահի, կառավարության եւ մի շարք նախարարությունների աշխատակազմերի ներկայացուցիչներ են:
Այցի նպատակը պետական գույքի կառավարման հայկական հաջողված փորձի ուսումնասիրությունն է` Ղրղզստանում այն կիրառելու նպատակով: Ղրղզստանի Հանրապետությունում պատրաստվում են պետական գույքի համընդհանուր հաշվառում իրականացնել եւ մասնագետների խումբը Հայաստան է գործուղվել Համաշխարհային բանկի «Պետական գույքի կառավարման բարելավում» ծրագրի շրջանակում, 2 հիմնական խնդրի շուրջ քննարկումների նպատակով:
ü պետական գույքի հաշվառման իրավական դաշտի վերլուծություն եւ մշակում՝ լայնածավալ գույքագրում անցկացնելու միջոցով
ü Ղրղզստանի Հանրապետության պետական գույքի միասնական ռեգիստրի միջգերատեսչական ավտոմատացված տեղեկատվական համակարգի մշակում եւ ներդրում:
Այսօր ՀՀ ԿԱ պետական գույքի կառավարման վարչությունում տեղի է ունեցել աշխատանքային հանդիպում՝ հագեցած օրակարգով: Պատվիրակությանը ողջունել է ՀՀ ԿԱ պետական գույքի կառավարման վարչության պետ Արման Սահակյանը, վստահեցրել, որ հյուրերը ճիշտ հասցեով են եկել եւ մեր փորձառու մասնագետների հետ քննարկումները, տեղեկատվության ու փորձի փոխանակումն իսկապես շատ արդյունավետ կլինեն:
«ՀՀ ԿԱ պետական գույքի կառավարման վարչությունը նորանկախ մեր երկրի տնտեսական նոր իրողության ու քաղաքականության ծնունդն է, որի միջոցով երկրում մասնավոր սեփականությանն ու պետական ունեցվածքի զանգվածային ապապետականացման հիմքն է դրվել: Եթե հիշում եք, ետխորհրդային տիրույթում առաջինը հենց Հայաստանի Հանրապետությունն է գնացել հողի սեփականաշնորհմանը: Եվ դա՝ պատերազմական գործողությունների, շրջափակման ու տնտեսական կտրուկ անկման պայմաններում: Եվ հենց հողի սեփականաշնորհումն է դարձել գյուղացիական նոր տնտեսությունների եւ ընդհանրապես գյուղատնտեսության զարգացման հիմքը: Ինչպես հողի, այնպես էլ պետական հազարավոր օբյեկտների, ընկերությունների սեփականաշնորհման գործընթացն իհարկե առանց խոչընդոտների չի ընթացել, սակայն մեզ հաջողվել է ընդունել մարտահրավերներն ու սկզբունքային լուծումներ տալ շատ հարցերի ու իրավիճակների: Մեր երկրի անկախության քառորդդարյա պատմության այս փուլում Վարչության առանցքային խնդիրը կառավարման արդյունավետության բարձրացումն է, ինչին ուղղված են մեր աշխատանքային բոլոր ծրագրերը, ի վերջո, ինչի հնարավորությունը մեզ ընձեռում է «Պետական գույքի կառավարման մասին» օրենքը. ասել է Արման Սահակյանը: