Չի կարելի ժխտել, որ նորանշանակ վարչապետը մի շատ կարեւոր գործ արեց. նախարարների կաբինետից եւ մարզային վարչակազմերից հեռացվեցին մարդիկ, որոնց հարստության եւ չարաշահումնների մասին միայն ծույլերը չէին խոսում կամ գրում: Հոկտեմբերի 21-ին Հայաստանի Ազգային ժողովում այս մասին հայտարարեց ՀԱԿ խմբակցության ղեկավար Լեւոն Զուրաբյանը:
Նրա խոսքով՝ դա, իհարկե, դրական քայլ էր, եւ պատահական չէ, որ հույսեր արթնացրեց բնակչության մի մասի մոտ, որ դրական փոփոխություններ կարող են լինել:
«Բնականաբար՝ հարց է առաջանում, արդյո՞ք այս կառավարությունն իսկապես չի ներկայացնում կոռումպացված համակարգը, որը Հայաստանում գործում էր վերջին 17 տարիներին, եւ պատրա՞ստ է, արդյոք, այդ համակարգի ապամոնտաժմանն ուղղված քայլեր կատարել: Թե՞ դա Սերժ Սարգսյանի նախընտրական հնարքն է, որի միակ նպատակն ընտրություններից առաջ իշխանությունների հանդեպ ժողովրդի համընդհանուր դժգոհությունն ու ատելությունը մեղմելն է, «մարդկային դեմքով» ներկայանալը եւ առաջիկա ընտրություններում ռեժիմի վերարտադրումը հնարավորինս հեշտացնելը»,- ասել է Լեւոն Զուրաբյանը:
