Բեզինի գնի նվազումը պայմանավորված է բացառապես մրցակցության խորացմամբ: Այս մասին այսօր՝ հոկտեմբերի 21-ին, լրագրողներին հայտնել է ՀՀ Տնտեսական մրցակցության պաշտպանության պետական Հանձնաժողովի նախագահ Արտակ Շաբոյանը՝ անդրադառնալով վերջին օրերին հանրապետությունում նկատվող բենզինի գնի նվազմանը:
«Հանձնաժողովի կողմից կատարված ուսումնասիրությունները փաստում են, որ ընթացիկ ամսվա սկզբից բենզինի շուկայում հայտնվել է նոր ընկերություն, որը ավելի ցածր գնով է ձեռք բերել բենզինը, ինչն էլ, բնականաբար անդրադարձել է վաճառքի գների վրա: Մեր դիտանցումները փաստում են, որ այդ նոր ընկերության՝ «Մաքս Պետրոլի»՝ շուկա մուտք գործելուց հետո բենզինի 1 լիտրի վաճառքի գինը նվազել է շուրջ 20 դրամով: Այսինքն, իրավիճակը պայմանավորված է բացառապես մրցակցության խորացմամբ»,-ասաց Շաբոյանը:
Ինչ վերաբերում է հետագայում եւս բենզինի գնի հնարավոր նվազմանը, Արտակ Շաբոյանը պատասխանեց, որ բենզինի գնագոյացման բաղադրիչները բավականին շատ են, եւ կանխատեսումներ հնարավոր չէ անել:
