«Սասնա ծռեր» խմբի անդամ Հովհաննես Վարդանյանի որդին՝ Մարտին Վարդանյանը, որը մեղադրվում է խմբին օժանդակելու մեջ, այսօր՝ հոկտեմբերի 21-ին, ազատ է արձակվել: Այս մասին NEWS.am-ի հետ զրույցում ասաց նրա փաստաբան Ստեփան Ոսկանյանը՝ նշելով, որ որոշումը կայացրել է Վերաքննիչ դատարանը:
«Իմ պաշտպանյալը գրավի դիմաց ազատ է արձակվել»,- ասաց փաստաբանը:
Ավելի վաղ փաստաբան Ստեփան Ոսկանյանը մեզ հետ զրույցում ասել էր, որ Մարտին Վարդանյանին մեղադրանք են առաջադրել` այդ կերպ ճնշում գործադրելու համար «Սասնա ծռեր» խմբի կազմում գտնվող նրա հոր՝ Հովհաննես Վարդյանյանի նկատմամբ: Նա նշել էր, որ իր պաշտպանյալի նկատմամբ առաջադրված մեղադրանքը հիմնավորված չէ, նրան մեղադրում են «Սասնա ծռեր» խմբին անդամների հեռախոսները լիցքավորելու եւ նրանց համար աջակիցներ փնտրելու մեջ։
Մարտին Վարդանյանին ձերբակալել էին հուլիսի 22-ին, 25-ին մեղադրանք առաջադրել ու կալանավորել։
