ՀՀ տրանսպորտի, կապի և տեղեկատվական տեխնոլոգիաների նախարարությունը դիմել է Ազգային ժողով, որպեսզի արագացվեն «Ավտոմոբիլային տրանսպորտի մասին» օրենքում փոփոխությունների և լրացումների գործընթացները: Այս փոփոխություններից հետո կկանոնակարգվի ոչ կանոնավոր ուղևորափոխադրումները և վերջապես ձևավորում կստանան տրանսպորտային ծառայություն մատուցելու հստակ կանոնները, որի անբաժանելի մասն է նաև անվտանգությունը: Օրենքում փոփոխությունների նախագիծը Ազգային ժողովում է արդեն մոտ մեկ տարի: Թե ինչու ԱԺ պատգամավորները, կամ նախկին նախարար Գագիկ Բեգլարյանը չեն զբաղվել օրենքով, որպեսզի փոփոխություններն ուժի մեջ մտնեն, հարցական է:
Ի դեպ նշենք, որ փոփոխությունների նախագիծը ԱԺ-ում է հայտնվել Տուլայում տեղի ունեցած Երևան-Մոսկվա ավտոբուսի վթարից հետո, որից զոհվեց 9 մարդ: Դա նույնպես բավարար չէր, որպեսզի օրենսդիրն ընդուներ օրենքի խստացումները:
Եվս մեկ վթար միջպետական ճանապարհներին տեղի ունեցավ օրեր առաջ մարդկային զոհերով և այս անգամ ևս ՀՀ տրանսպորտի, կապի և տեղեկատվական տեխնոլոգիաների նախարարությունը պատժամիջոցներ կիրառել չէր կարող լծակների բացակայության պատճառով, քանի որ օրենսդրությունն ազատականացված է։
Այս և նմանօրինակ խնդիրների կարգավորման ճանապարհին կարևոր է առաջին հերթին ուղևորափոխադրող տրանսպորտային միջոցների տեխնիկական զննման չափորոշիչների հստակեցումն ու վերահսկողության մեխանիզմների ներդրումը, հետևողական մոնիտորինգի իրականացումը։
ՀՀ տրանսպորտի, կապի և տեղեկատվական տեխնոլոգիաների նոր նախարար Վահան Մարտիրոսյանը լրագրողների հետ զրույցում նշել է, որ համապատասխան միջոցներ կձեռնարկվեն ուղևորափոխադրումների անվտանգությունը բարձրացնելու ուղղությամբ, ինչպես հանրապետության ներսում, այնպես էլ միջպետական ճանապարհներին։
Մեխանիզմների և ընթացակարգերի մշակումը, որոնք կնպաստեն անվտանգ ուղևորափոխադրումներին, առաջնահերթ լուծում պետք է ստանան՝ ապահովելով անվտանգ և տեխնիկապես անխափան տրանսպորտային միջոցների շահագործումը ճանապարհներին։