Որքան ամուր լինի Հայաստանի պաշտպանական համակարգը, այնքան ամուր կլինեն մեր դիրքերը բանակցություններում։ Այդ մասին «Արմենիա» հեռուստաընկերության եթերում հայտարարել է Հայաստանի պաշտպանության նախարար Վիգեն Սարգսյանը, որը այսօր գլխավոր շտաբի պետի հետ մեկնել է Արցախ։ 

Դիտարկմանը, թե ապրիլյան պատերազմից հետո կրկին սկսել են շրջանառվել տարածքների հանձնման, փոխզիջումների մասին խոսակցությունները, Վիգեն Սարգսյանը պատասխանել է, թե հարցը պետք է տալ հակամարտության կարգավորման բանակցություններով զբաղվողներին։ «Փոխզիջումների շեմը որոշվում է բանակցությունների ընթացքում եւ սահմանվում է գերագույն գլխավոր հրամանատարի կողմից՝ խորհրդակցելով բոլոր շահառու կողմերի հետ։ ՊՆ գործառույթը այլ է, բարձրացնել պաշտպանական համակարգի ամրությունը։ Որքան ամուր լինի Հայաստանի պաշտպանական համակարգը, այնքան ամուր կլինեն մեր դիրքերը բանակցություններում»,- ասել է նա։

Նախարարը նաեւ խոսել է այսօր առավոտյան ադրբեջանական զինուժի ձեռնարկած դիվերսիոն ձախողված փորձի մասին։ «Մենք գիտենք, որ ադրբեջանական կողմը ունի բացահայտ ագրեսիվ վերաբերմունք եւ պարբերաբար հայտարարում է ռազմական եղանակով խնդիրը լուծելու մասին։ Նման փորձերը շարունակվելու են այնքան ժամանակ, քանի դեռ ադրբեջանցիները չսկսեն սիրել իրենց զավակներին այնքան, որքան ատում են մեր զավակներին»,- նշել է նախարարը՝ բարձր գնահատելով մեր զինծառայողների պատրաստականությունը. «Արհեստավարժ պատրաստ են պատասխանել, չկա որեւէ խուճապ, եւ դա առանձնակի նշանակություն ունի»։