2016-ի սեպտեմբերից Հայաստանի եւս 6 դպրոցներում սկսել են դաավանդել ՏՏ, միկրոէլեկտրոնիկա եւ հեռահաղորդակցություն։ Այս մասին NEWS.am –ի թղթակցին տեղեկացրել է ՏՏ ու հեռահաղորդակցության գործատուների միության նախագահ, «Յունիկոմպ» ՓԲԸ գործադիր տնօրեն Արմեն Բալդրյանը։
Միության անունից Կրթության ու գիտության նախարարության հետ համագործակցում են «Յունիկոմպ» համակարգչային տեխնիկայի դիստրիբյուտորը, Vivacell-MTS հեռահաղորդակցային օպերատորը ու Synopsys Armenia չիպեր նախագծող ընկերությունը։ 2015-ին այդ 3 ինժեներային առարկաները առաջին անգամ ներառվել են հանրապետության 5 դպրոցների (3-ը Երեւանում ու 1-ական Գյումրի ու Վանաձոր քաղաքներում) պարտադիր ուսծրագրում։ Այս ուսումնական տարվանից դրանց գումարվել են եւս 6 դպրոցներ։ Իսկ հաջորդ տարվանից ուսծրագրում մտադիր են ներառել ծրագրավորման լեզուների խորացված ուսումնասիրություն։
«Ամեն տարի դպրոցների ուսուցիչները մեր ընկերության մասնագետների մոտ վերապատրաստում են անցնում։ Մենք նաեւ վերանայում ենք դասընթացների բովանդակությունը, քանի որ տեխնիկայի աշխարհում ամեն ինչ շատ արագ է փոխվում։ Եվ իհարկե օգնում ենք սարքավորել լաբորատորիաներ գործնական պարապմունքների համար։ Առանց դրանց ինժեներներ պատրաստել հնարավոր չէ»,- նկատեց Բալդրյանը։
Մինչ այդ ստորագրված հռչակագրի շրջանակում ՏՏ ու Հեռահաղորդակցության գործատուների միությունն ու Կրթության նախարարությունը պայմանավորվել են մինեւ 2025 թ․ այդ առարկաների դասավանդումը ներառել հանրապետության բոլոր դպրոցներում։ «Բայց ես անձամբ այդքան էլ համաձայն չեն այդ գրաֆիկին։ Ավելի արագ է պետք գործել»,- հավելեց Արմեն Բալդրյանը։