Երեւանում, այսօր՝ հոկտեմբերի 23-ին, փրկարարների եւ ոստիկանների կողմից կանխվել է քաղաքացու ինքնասպանության փորձը։
Ավելի վաղ NEWS.am-ը հայտնել էր, որ այսօր ժամը 17.20-ին ՀՀ արտակարգ իրավիճակների նախարարություն ահազանգ էր ստացվել, որ Երեւանի Հակոբ Հակոբյան 9/1 շենքի տանիքից քաղաքացին փորձում է ինքնասպան լինել. անհրաժեշտ է փրկարարների օգնությունը:
Դեպքի վայր են մեկնել մեկ մարտական հաշվարկ, ճգնաժամային կառավարման ազգային կենտրոնի օպերատիվ եւ հոգեբանական խմբերը:
Shamshyan.com-ի փոխանցմամբ, շենքը 14 հարկանի է եւ քաղաքացուն տեւական ժամանակ փրկարարներն ու ոստիկանները համոզում էին, որ նա չդիմի այդ ծայրահեղ քայլին։ Ի վերջո, ոստիկանության աշխատակիցներին եւ փրկարարներին հաջողվել է քաղաքացուն համոզել, որպեսզի նա հրաժարվի այդ քայլից, որից հետո նրան տեղափոխել են ոստիկանության Արաբկիրի բաժին։
Պարզվել է, որ այդ քաղաքացին Երեւանի բնակիչ, 51-ամյա Մարատ Մ.-ն է։