Վրաստանի նախագահ Միխայիլ Սահակաշվիլիի՝ վերջերս մերկ վիճակով հանրության առաջ հայտնվելը իսկական աժիոտաժ է ստեղծել երկրում:
«Մաեստրո» հեռուստաալիքի «Ամենօրյա հաբեր» երգիծական հաղորդման հաղորդավար Վասիկո Օդիշվիլին կիսով չափ մերկացել է ուղիղ եթերում եւ այդպես էլ վարել հաղորդումը՝ ծաղրելով Վրաստանի նախագահին, գրում է «Վզգլյադ» թերթը:
Երբ հաղորդումն ավարտվել է, ուղիղ եթերում կիսով չափ մերկացել են եւս մի քանի աշխատակիցներ:
Ինչպես արդեն հայտնել է NEWS.am-ը, Վրաստանի նախագահ Միխայիլ Սահակաշվիլին հոկտեմբերի 20-ին, Բաթումիում լողացել է Սեւ ծովում: Նա շուրջ 3 կմ ջրատարածություն է անցել ակումբի նավակով:
Ջրից դուրս գալով Սահակաշվիլին iPod-ի օգնությամբ համեմատել է ջրի ջերմաստիճանն ու օդի խոնավությունը համաշխարհային հայտնի հանգստավայրերի հետ:
Նա ասել է, որ շատերն են բողոքում, որ Բաթումիում բարձր է խոնավության աստիճանը, բայց պարզվում է, հայտնի համաշխարհային ծովափերում այդ աստիճանն ավելի բարձր է:
Թերեւս մարմնի բարեմասնությունները ցույց տալը բարի ավանդույթ է դառնում պետությունների ղեկավարների համար: Ռուսաստանցիներն արդեն տեսել են Վլադիմիր Պուտինին, իսկ ամերիկացիները հպարտանում են Բարաք Օբամայի կիսամերկ նկարներով:
