Վրաստանում ռազմական կրթության «Կրծանիսի» հրամանատարության պահակային կենտրոնը կանխել է անհայտ անձանց հարձակումը: Հարձակվողներից մեկը սպանվել է: «Sputnik Գրուզիա»-ի փոխանցմամբ՝ այս մասին հաղորդում է Վրաստանի ՊՆ մամուլի ծառայությունը:
Հարձակումը տեղի է ունեցել տեղական ժամանակով 03:30-ին: «Մի քանի անհայտ անձ չեն ենթարկվել ժամապահների բանավոր պահանջին եւ հարձակվել են նրա վրա, ինչից հետո ժամապահը հետեւել է կանոնադրությամբ նախատեսված պահանջին եւ կանխել է կենտրոնի տարածք ներթափանցումը»,- ասված է հաղորդագրությունում:
Հետաքննություն է տարվում՝ Վրաստանի Քրեական օրենագրքի 116 հոդվածի հատկանիշներով (անզգուշությամբ կյանքից զրկելը), ինչը նախատեսում է մինչեւ 4 տարի ժամկետով ազատազրկում: Կրծանիսի կենտրոնում ՆԱՏՕ-Վրաստան մարզումների եւ գնահատման համատեղ կենտրոնի (JTEC) շտաբի շենք է կառուցվում: