InecoՕne-ը էականորեն տարբերվում է շուկայում առկա առաջարկներից եւ արմատական փոփոխություններ կանի բանկային սպասարկման ոլորտում», այդ մասին նշեց Ինեկոբանկի Բրենդի զարգացման ծառայության ղեկավար Լեւոն Ռուբինյանը՝ ներկայացնելով InecoOne անձնական ֆինանսների կառավարման համակարգը:
«Ժամանակը թելադրում է աճող անկանխիկ գործարքների սպասարկում: Ինտերնետ միջավայրում պետք է հասանելի լինեն կոմունալ վճարումները, փոխանցումները, արտարժույթի փոխանակումը, վարկավորումը եւ վարկերի վճարումները, ինչպես նաեւ՝ խնայողություններ կատարելու համար գործիքները:
Այս ծառայությունները Հայաստանում արդեն գործում են, սակայն ամբողջը մի տեղից ստանալ եւ կառավարելը դեռ խնդիր է, արդյունքում ստիպված ենք բազում տարբեր ծառայություններից օգտվել ու դրա համար մի քանի տեղ վճարել: InecoOne-ը լուծել է այդ խնդիրը՝ համախմբելով բոլոր գործիքները մեկ վայրում:
Կարծում ենք՝ բանկերը հետ են մնացել առցանց վճարային համակարգերից: Այսինքն՝ բանկերը հաճախորդին չեն տալիս առցանց գործարքների այնպիսի հարմարություն, ինչպիսին՝ վճարման համակարգերը: Մենք ոչ միայն լրացնում ենք այդ բացը, այլեւ՝ պարզեցնում օգտագործումն ու վճարումը:
InecoOne համակարգի մի մասն են InecoOnline ծրագիրն ու InecoMobile հավելվածը իրենց նախադեպը չունեցող ֆունկցիոնալությամբ, որոնցից կարելի է նշել «ԻնեկոԸնկեր» ծառայությունը: Այս ծառայության շնորհիվ բանկի հաճախորդները կարող են իրար առցանց գումար փոխանցել՝ առանց որեւէ ձեւաթուղթ լրացնելու: Պետք է ընդամենը ընտրել ընկերոջ հեռախոսահամարը կամ էլ. փոստը եւ նշել գումարի չափը:
Նույն հեշտությամբ կարելի է հաշվին գումար մուտքագրել Հայաստանում գործող վճարային տերմինալների, ինչպես նաեւ InecoExpress տերմինալների միջոցով:Գումարը փոխանցվում է մի քանի րոպեում: Պետք չէ սպասել մի քանի ժամ, կամ առավել եւս՝ շաբաթից երկուշաբթի», - նշեց Ռուբինյանը:
«Սակայն մենք ուզում ենք հաճախորդին մոտ լինել ոչ միայն օնլայն տիրույթում, այլ նաեւ քաղաքի փողոցներում: Ուստի InecoOne համակարգի շրջանակներում տրամադրվող քարտով կարելի է գումար կանխիկացնել ArCa ցանցի բոլոր 900+ բանկոմատներից՝ առանց միջնորդավճարի», -հավելեց բանկի ներկայացուցիչը:
InecoOne համակարգում ծառայությունների ամբողջ փաթեթը հասանելի է ընդամենը 500 դրամ ամսական վճարով:
«500 դրամ վճարի մասին ես նշեցի ոչ միայն որովհետեւ այն բարձր չէ, այլ որովհետեւ մեկ պարզ վճար է: Շատ անգամ հաճախորդի մոտ դժգոհություն է առաջացնում ոչ թե ավել հարյուր դրամը, այլ այդ հարյուր դրամը ամեն քայլափոխի վճարելը», - ընդգծեց Ռուբինյանը:
«Բանկի հաճախորդ դառնալու պրոցեսը հեշտացրել ենք. InecoOne-ին կարելի է գրանցվել առցանց: Անվճար փորձելու հնարավորություն ենք տվել եւ համակարգի մի մասը որոշել ենք առաջարկել ամբողջովին առցանց: Այդ դեպքում հնարավոր կլինի Ինեկոբանկի ներսում՝ բանկի հաճախորդների միջեւ փոխանցումներ կատարել, վարկերի վճարումներ անել, իսկ բանկից դուրս վճարել կոմունալ վճարումներ, հարկեր եւ այլ պետական վճարներ», - եզրափակեց Ռուբինյանը: