Ես հանդիպել եմ Հայաստանի նոր վարչապետի հետ. կարող եմ վերահաստատել, որ փոխադարձ կամք կա՝ ՀՀ կառավարության ու Եմ կողմից միմյանց հետ աշխատելու, հասնելու առավելագույն արդյունքի՝ ի շահ Հայաստանի տնտեսության: Այս մասին, այսօր՝ հոկտեմբերի 24-ին, լրագրողների հետ հանդիպման ժամանակ նշել է Հայաստանում ԵՄ պատվիրակության ղեկավար, դեսպան Պյոտր Սվիտալսկին՝ ներկայացնելով Հայաստանում այսօր մեկնարկած «ԵՄ-ն բիզնեսի համար» խորագրով միջոցառումների շարքը:
«Նոր կառավարության մասով կարծում եմ, մենք կարող ենք շատ լավ նպատակներ տեսնել։ Հանդիպել եմ նոր վարչապետին, փոխադարձ կամք կա՝ ՀՀ կառավարության ու Եմ կողմից միմյանց հետ աշխատելու, հասնելու առավելագույն արդյունքի՝ ի շահ Հայաստանի տնտեսության: Փոքր ու միջին ձեռնարկությունների առջեւ կան հարկման ու մաքսային ծառայությունների հետ կապված խնդիրներ։ Դրանք արտացոլված են կառավարության ծրագրում։ Երկրորդ հանգամանքը բիզնեսի արդար միջավայրն է։ ԵՄ բիզնեսի միությունը մշակել է 5 հիմնական տարրեր, որոնք կարող են բարելավել բիզնես միջավայրը Հայաստանում։ Այդ խորհուրդները օգտակար են եւ կառավարության, եւ գործարարների հաամար։ Այդ առաջարկներից մի քանիսը հուսամ տեղ կգտնեն պրակտիկայում»,-հայտարարեց Սվիտալսկին՝ հավելելով. «Երրորդ տարրը դատական համակարգի, իրավունքի գերակայությունն է եւ պայքարը կոռուպցիայի դեմ, որը կարեւոր է ՓՄՁ-ների համար»:
ԵՄ դեսպանը նշեց, որ Հայաստանում լրջագույն խնդիրներից է նաեւ ՓՄՁ-ների համար ֆինանսների հասանելիությունը: «Ներքին ֆինանսավորման ծավալը Հայաստանում շատ համեստ է։ Մենք երկու խոշոր ծրագրեր ունենք Հայաստանում, որոնք մի քանի մլն եվրոյի են հասնում։ Սա կարող է օգնել ՓՄՁ-ներին։ Ես պարզեցի, որ Հայաստանում ՓՄՁ-ների մասնակցությունը 30 տոկոս է։ Գերմանիայում զարգացման ու տնտեսական հաջողության հիմքը հենց ՓՄՁ-ներն են։ Հույս ունեմ, որ ՓՄՁ-ները կարեւոր սուբյեկտ կլինեն ՀՀ տնտեսության աճի մեջ»,-ընդգծեց նա: