Կանադացի արքեպիսկոպոս, ասորական թեմի ղեկավար Հաննա Զորան Թբիլիսիի հյուրանոցներից մեկում վախճանվել է Վրաստան Հռոմի պապ Ֆրանցիսկոսի այցի ժամանակ: Այս մասին հայտնել են վրացական լրատվամիջոցները՝ վկայակոչելով հյուրանոցի աշխատակիցներին:
Արքեպիսկոպոսը Թբիլիսի էր ժամանել Խալդիական կաթոլիկ եկեղեցու սրբազան սինոդի անդամների հետ՝ Հռոմի պապին հանդիպելու համար: Հովվապետը Վրաստան էր այցելել սեպտեմբերի 30-ին եւ երկրից հեռացել էր հոկտեմբերի 2-ին:
«Հոգեւորականը մասնակցել է Հռոմի պապի այցի շրջանակում կազմակերպված հանդիպումներին: Պատվիրակության անդամները իջեւանել էին Holiday inn հյուրանոցում, սակայն հոկտեմբերի 2-ին արքեպիսկոպոսին մահացած են գտել»,- հայտնել է Primetime-ը:
Շրջանառվող տեղեկությունների համաձայն՝ հոգեւորականն առողջական խնդիրներ է ունեցել, եւ նրան խորհուրդ էին տվել Վրաստան չմեկնել, որպեսզի նրա վիճակը չվատանա: