«Լրագրողների դպրոցում» սպանված Սեւանի 22-ամյա բնակիչ Լեւոն Սահակյանը ընտանիքի միակ տղան էր, ունի իրենից մեծ քույր: NEWS.am-ի հետ զրույցում սպանված երիտասարդի հարեւանուհիներից տիկին Մարիետան պատմեց, որ Լեւոնը օրինակելի եւ կրթված ընտանիքից էր՝ հայրը Հրազդանի բժշկական կենտրոնում բժիշկ է աշխատում , իսկ մայրը՝ Սեւանի միջնակարգ դպրոցում ուսուցչուհի:
«Շատ լավ ընտանիքից է՝ օրինակելի, կրթված: Հայրն ու մայրը շատ հույսեր էին կապում Լեւոնի հետ, ինքն էլ արդարացնում էր: Այնքան նպատակներ ունեին իրենց միակ տղայի հետ կապված, բայց այդպես էլ չկարողացան իրականացնել, ամեն ինչ կիսատ մնաց: Հայրը ասում էր՝ հազարավոր վիրահատություններ եմ արել, բոլորի կյանքը փրկել եմ, բայց իմ տղայինը չկարողացա...»:
Ավելի վաղ NEWS.am-ը տեղեկացրել էր, հոկտեմբերի 19-ի երեկոյան «Պատանի լրագրողների» դպրոցի տնօրեն Վահան Ղազարյանի եւ Լեւոն Սահակյանի միջեւ վիճաբանությունն սկսվել էր Լեւոնի նշանածի աշխատավարձը չվճարելու պատճառով: Լեւոնի նշանածը՝ Սեւան քաղաքի բնակչուհի Արեգնազը, աշխատելիս է եղել Վահան Ղազարյանի մոտ, որը նրա աշխատավարձը չէր վճարել: Այդ օրը Վահան Ղազարյանը 22-ամյա երիտասարդին զանգել եւ կանչել է դպրոց՝ նշանածի աշխատավարձը տալու համար, սակայն, նրանց միջեւ վիճաբանություն է սկսվել, որից հետո սրտի եւ թոքի վնասվածքներով Լեւոնը տեղափոխվել է հիվանդանոց, որտեղ երկու օր անց մահացել է:
Վահան Ղազարյանը կալանավորված է:
