Մեր կոշտ դիրքորոշումը եղել է եւ հիմա էլ մնում է երևույթների նկատմամբ. մեր դիրքորոշումը երբեւէ ուղղված չի եղել որեւէ անձի դեմ: Այս մասին, այսօր՝ հոկտեմբերի 25-ին, ԱԺ-ում լրագրողների հետ զրույցում նշել է ԱԺ փոխնախագահ Էդուարդ Շարմազանովը՝ անդրադառնալով ԲՀԿ նախկին նախագահ Գագիկ Ծառուկյանի հնարավոր վերադարձին և նրա հասցեին ՀՀԿ-ականների քննադատություններին:
«Ես Ծառուկյան Գագիկը չեմ, որ ինձ եք հարցնում: Պարոն Ծառուկյանին հարցրեք, թող պատասխանի: Ես որպես իշխանության ներկայացուցիչ մի անգամ պատասխանել եմ: Մեջբերել եմ մեզնից 2500տարի առաջ ապրած հին հույն փիլիսոփա Հերակլիտի հետեւյալ միտքը. «ամեն ինչ հոսում է, ամեն ինչ փոփոխվում է»,-ընդգծել է Շարմազանովը:
Հիշեցնենք, որ նախօրեին մի խումբ ԲՀԿ-ականների ԲՀԿ խմբակցության պատգամավոր Վահե Էնֆիաջյանի գլխավորությամբ ցույց են արել Գագիկ Ծառուկյանի տան մոտ՝ խնդրելով նրան վերադառնալ քաղաքականություն: