Հայաստանում նախընտրական շրջան է եւ կոսմետիկ շտկումներ են արվում: Այս մասին, այսօր՝ հոկտեմբերի 25-ին, լրագրողների հետ հանդիպման ժամանակ նշել է «Ազատ դեմոկրատներ» կուսակցության փոխնախագահ Անուշ Սեդրակյանը:
Նա կանխատեսեց, որ կլինի կարճաժամկետ ցավազրկումների շրջան, որը կապահովի հասարակական դժգոհության նվազումը. «Բայց ես չեմ տեսնում բարեփոխումներ: Որքա՞ն ժամանակ կաշխատեն սոցիալական այս բարձիկները, որովհետեւ Հայաստանը ներդրումների համար գրավիչ չէ, միայն հումքահան երկիր է: Հիմնարար խնդիր չեն լուծելու, աշխատելու է մինչեւ ընտրական շրջան, որից հետո հերթական դեպրեսիայի ալիքն է լինելու, վերարտադրվելուց հետո այլեւս նույն այդ կոսմետիկ շտկումների կարիքը չի ունենալու»,-ընդգծեց Սեդրակյանը:
Նա կառավարության ներկայացրած ծրագիրը «բացահայտումային» է համարում, քանի որ այնտեղ բարձրաձայնվում են բազմաթիվ հարցեր, որոնք նախկինում համոզում էին, թե չկա. «Ասում էին չկա մենաշնորհ, չկա տնտեսական հետընթաց, խոշորամասշտաբ գողություն»:
«Ասում էինք մենաշնորհ կա, ասում էին՝ ի՞նչ եք ասում, ասում էինք տնտեսական հետընթաց կա, ասում էին չէ՝ նույնիսկ Պուտինի մակարդակով, ասում էինք, որ ԵՏՄ-ից վնասներ կան, ասում էին՝ ոչ, ասում էինք խոշորամաշստաբ գողություն կա, ասում էին՝ չէ»,- նշեց «Ազատ դեմոկրատների փոխնախագահը:
Նա կարծիք հայտնեց, որ նոր ներդրումային ֆոնդի ստեղծումը ոչինչ չի տալու, եթե չկան ներդրումների համար բարենպաստ պայմաններ. ««Պարզվեց, որ խնդրի լուծումը եւս մեկ կառույցի ստեղծումն է՝ ներդրումային ֆոնդ կամ հիմնադրամ անունը կրող, որն այնպես չէ, որ նախկինում չկար, ուղղակի այլ անվանմամբ, մինչդեռ ներդրումներ բերելու համար պետք չէ նոր հիմնադրամ ստեղծել, պետք է ներդրումային միջավայրը բարելավել, հակառակ դեպքում՝ նույն հիվանդ միջավայրի ու մաքսահարկային համակարգի դեպքում, փոշիանալու են գումարները»:
