Շիրակի մարզի Շիրակ գյուղում հոկտեմբերի 24-ին սպանված 55-ամյա Լյովա Հաջյանի սպանության մեջ կասկածվում է նրա տղայի աներորդին: Շիրակ գյուղի բնակիչներից NEWS.am-ին տեղեկացրին, որ ըստ շրջանառվող տեղեկությունների, տղամարդու դանակահարությունը տեղի է ունեցել խանդի հողի վրա. սպանված Լյովա Հաջյանը սիրահետել է իր որդու զոքանչին, որի մասին իմանալուց հետո վիճաբանություն է տեղի ունեցել, որի ընթացքում էլ տղամարդը ստացել է մահացու վնասվածքը:

Կասկածյալը ձերբակալվել է:

Ավելի վաղ NEWS.am-ի հետ զրույցում Շիրակի գյուղապետ Խորեն Հարությունյանը նշել էր, որ Լյովա Հաջյանին սեփական տան դիմաց արնաշաղախ վիճակում հայտնաբերել է նրա եղբոր որդին:

Հիշեցնենք, որ Շիրակ գյուղի բնակիչ 55-ամյա Լյովա Հաջյանին դանակահարված վիճակում հայտնաբերել են իր տան դիմաց եւ տեղափոխել Գյումրիի բժշկական կենտրոն:

NEWS.am-ին բժշկական կենտրոնի մամուլի ծառայությունից հայտնեցին, որ տղամարդն իրենց մոտ է տեղափոխվել 17:35-ի սահմանում, նրա մոտ ֆիքսվել է կենսաբանական մահ: Հիվանդանոց տեղափոխված տղամարդու մոտ հայտնաբերվել են կտրած-ծակած վերքեր կրծքավանդակի շրջանում եւ ճակատային եւ քթի շրջանի՝ սալջարդեր: