ՀՀ էներգետիկ ենթակառուցվածքների եւ բնական պաշարների նախարարությունը եւ «Ռոսգեոլոգիա» բաժնետիրական ընկերությունը կհամագործակցեն երկրաբանության եւ ընդերքօգտագործման ոլորտում՝ Հայաստանի Հանրապետության հանքահումքային բնագավառի զարգացման եւ ամրապնդման համար օգտակար հանածոների հանքավայրերի որոնման, գնահատման եւ հետազոտման աշխատանքներ իրականացնելու նպատակով:

Նախարարությունից NEWS.am-ին հայտնում են, որ կողմերը մտադիր են զարգացնել համագործակցությունը մի շարք  առաջնահերթ ուղղություններով։

Խոսքը, մասնավորապես, պինդ օգտակար հանածոների, ածխաջրածնային հումքի եւ ստորգետնյա ջրերի նպատակային որոնողական աշխատանքների, հաշվառված բոլոր տեսակի օգտակար հանածոների պահուստային հանքավայրերի երկրաբանատնտեսական վերագնահատման, առավել հեռանկարային հանքավայրերի եւ հանքերեւակումների պաշարների լրահետախուզման եւ վերահաշվարկման, դրանց յուրացման տեխնիկատնտեսական հիմնավորման, լեռնահանքային եւ վերամշակող ձեռնարկությունների թափոնների արդյունաբերական գնահատման, օգտահանման եւ վերամշակման տեխնոլոգիաների մասին է։

Համագործակցության կարեւոր ուղղություններից մեկն էլ վերաբերելու է նավթի եւ գազի երկրաֆիզիկական հետազոտությունների եւ հորատման աշխատանքների իրականացմանը։

Նախատեսվում է ստեղծել աշխատանքային խումբ, որը կընտրի երկրաբանության եւ ընդերքօգտագործման ոլորտում համագործակցության հեռանկարային ուղղությունները, կսահմանի երկրաբանական կամ ընդերքօգտագործման օբյեկտները, որտեղ անհրաժեշտ է համագործակցել երկրաբանական ուսումնասիրության, տեխնիկատնտեսական վերլուծության, երկրաբանահետախուզական եւ այլ աշխատանքների շրջանակներում՝ խնդիրների ձեւակերպման եւ միջնաժամկետ ծրագրերի մշակման նպատակով։