Հայաստանի ճանապարհաշինության ոլորտը հետաքրքրում է չինական ընկերություններին: Այս մասին, այսօր՝ հոկտեմբերի 25-ին, ՀՀ տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանի հետ հանդիպման ժամանակ նշել է ՀՀ-ում Չինաստանի արտակարգ եւ լիազոր դեսպան Թիան Էրլունը։

ՀՀ տրանսպորտի, կապի  եւ տեղեկատվական տեխնոլոգիաների

Նախարարությունից NEWS.am-ին հայտնում են, որ նախարարը, ողջունելով դեսպանին, նշեց, որ տրանսպորտի, կապի եւ տեղեկատվական տեխնոլոգիաների ոլորտում Հայաստանի եւ Չինաստանի միջեւ համագործակցության ամուր հիմքեր կան։ Չինական բազմաթիվ  ընկերություններ են աշխատում Հայաստանում, դրանց թվում է «Սինոհիդրո Քորփորեյշնը», որն իրականացնում է «Հյուսիս - հարավ ճանապարհային միջանցքի» Տրանշ 3 հատվածի շինարարությունը։

Նախարարը կարեւորեց, որպեսզի առաջիկայում չինական ճանապարհաշինական ընկերություններն ավելի ակտիվ ներգրավվեն Հայաստանի Հանրապետությունում ընթացող ճանապարհաշինական  ծրագրերում։

Դեսպան Թիան Էրլունը նախ շնորհակալություն հայտնեց նախարարին  ընդունելության համար, ապա ընդգծեց, որ ճանապարհաշինության ոլորտը հետաքրքրում է չինական ընկերություններին, բացի այդ նրանք հարուստ փորձ ունեն նաեւ թունելաշինության  ոլորտում, ուստի «Հյուսիս – հարավի» հատկապես հարավային մասի շինարարությունը կարող է հետաքրքրել իրենց։

Հանդիպման ընթացքում անդրադարձ եղավ նաեւ ՏՏ ոլորտին։  Նշվեց, որ մեծ հնարավորություններ կան երկու երկրների միջեւ բարձր տեխնոլոգիաների ոլորտն էլ ավելի զարգացնելու եւ լավ արդյունքներ ապահովելու համար։

Համաձայնություն ձեռք բերվեց առավել ակտիվացնել համագործակցությունը նաեւ այս ոլորտում։