Քաղաքականության մեջ ընտրությունների միջոցով են ձեւավորվում իշխանությունն ու ընդդիմությունը, անկախ ՀԱԿ-ի եւ ՀՀԿ-ի, ԲՀԿ-ի ու «Վայկական վերածնունդի» ցանկությունից, ներկա ու նախկին պաշտոնյաների ամբիցիաներից ժողովուրդն իր ընտրությամբ կորոշի ով կմնա իշխանություն, ով կգնա իշխանությունից: Այս մասին, այսօր՝ հոկտեմբերի 25-ին, ԱԺ-ում լրագրողների հետ զրույցում նշել է ԱԺ փոխնախագահ, ՀՀԿ մամուլի խոսնակ Էդուարդ Շարմազանովը:
Անդրադառնալով ՀԱԿ խմբակցության ղեկավար Լեւոն Զուրաբյանի հայտարարությանն այն մասին, որ ՀԱԿ-ը պատրաստվում է միավորվել ընդդիմադիր ուժերի հետ եւ 2017-ին իշխանափոխություն իրականացնել, Շարմազանովն ասաց. «Հայտարարություններ անող ուժերին կխնդրեի, որ նախեւառաջ իրենք իրենց մեջ տեսնեն խնդիրը։ ՏԻՄ ընտրություններին մենք տեսանք, որ ընդդիմության մի լուրջ ընտրազանգված ձայն չտվեց իշխանությանը, բայց նաեւ ձայն չտվեց ձեր նշած ուժերին (ՀԱԿ-ին-խմբ)։ Թող իրենց մեջ խնդիրները տեսնեն, նոր գան հայտարարություններ անեն: Միգուցե նրանք հոգեւարքի, ֆիասկոյի մեջ են: Մենք տեսանք, որ ԲՀԿ-ին, ԳԱԼԱ-ին, «Հայկական վերածնունդին» ձայն տվեցին Գյումրիում, Վանաձորում «Լուսավոր Հայաստանը», ԲՀԿ-ն ու «Հայկական վերածնունդը» հավաքեցին ձայներ, բայց ձեր նշած քաղաքական ուժը ոչ Վանաձորում ձայն հավաքեց, ոչ՝ Գյումրիում: Մի քաղաքական ուժ, որը մասնակցում է ընտրություններին եւ երկու տեղում էլ անհաջողության է մատնվում, բնականաբար խնդիրներ ունի»:
Շարմազանովի խոսքով՝ միանում են այն քաղաքական ուժին, որն ամենաազդեցիկն է, իսկ Գյումրիի եւ Վանաձորի ընտրություններին ՀԱԿ-ի մասնակցությունը ցույց տվեց, որ այն ընդդիմության ամենաազդեցիկ ուժը չէ։ «Ոչ Համախմբումը, ոչ ՀԱԿ-ը, այս պահին ընդդիմության ամենաազդեցիկը ուժը չեն: Վաղը կլինեն, թե չեն լինի, չգիտեմ, չեմ կարող գուշակություն անել, Վանգան չեմ»:
Շարմազանովը մշուշոտ է համարում, որ ընդդիմադիր բոլոր ուժերը կարող են միավորվել: «Այսօր ընդդիմադիր ուժերից գոնե մեկը հայտարարել է, որ չի պատրաստվում միավորվել ՀԱԿ-ի հետ: Ընդդիմադիր ուժերը չպետք է միավորվեն` ում պրիչոսկեն, ում դուրն եկավ, ով ա լավը…. պետք է գաղափարի շուրջը միավորվեն: Ո՞րն է այդ գաղափարը»,- նշեց Շարմազանովը՝ հավելելով, որ իշխանափոխությունը չի կարող ոչ գաղափար լինել, ոչ էլ նպատակ:
