Ե՛վ նախագահ Ալիեւը, ե՛ւ նախագահ Սարգսյանը իրական հայրենասերներ են, նրանք հավատում են իրենց երկրին, իրենց ժողովրդին, ես հարգում եմ դա։ Այս մասին հոկտեմբերի 25-ին՝ Երեւանում կայացած մամուլի ասուլիսին, ասել է ԵԱՀԿ ՄԽ ամերիկացի համանախագահ Ջեյմս Ուորլիքը։
Անդրադառնալով NEWS.am–ի այն հարցին, թե ինքը ադրբեջանական կողմից քաղաքական կամք տեսնում է արդյոք խաղաղության համաձայնագրի կնքման համար, դիվանագետը նշել է. «Ես ավելի քան 3 տարի այս պաշտոնում եմ։ Ես բացարձակապես վստահ եմ, որ երկու նախագահն էլ հակված են ղարաբաղյան հակամարտության խաղաղ կարգավորմանը։ Կողմերից ոչ մեկը պատերազմ չի ուզում։ Նրանք գիտեն այն բարձր գինը, որը կբերի հակամարտության վերսկսումը։ Ոչ ոք չի ուզում դա նորից տեսնել։ Ալիեւն ու Սարգսյանը ամբողջովին հավատարիմ են համանախագահների հետ աշխատանքին առաջարկների քննարկման հարցում, սակայն դա միշտ չէ հեշտ»,– ասել է Ուորլիքը։
