Շիրակի մարզի Շիրակ գյուղում հոկտեմբերի 24-ին սպանված 55-ամյա Լեւոն Հաջյանի սպանության գործով հարուցվել է քրեական գործ: Այս մասին NEWS.am-ը տեղեկանում է ՀՀ քննչական կոմիտեի մամուլի ծառայությունից:
Տղամարդու դիակի արտաքին զննությամբ հայտնաբերվել են «աջ վերակնակապճային հատվածի սալջարդ, պատռված վերքի, արյունահոսության հետքերով քթի այտուցված սալջարդի, կրծքավանդակի առաջային մակերեսի հարկրծոսկրի հատվածի ծակած-կտրած վերքի» ձեւերով մարմնական վնասվածքներ:
Ձեռնարկված միջոցառումների արդյունքում պարզվել է, որ տղամարդը կյանքի հետ անհամատեղելի մարմնական վնասվածքներն ստացել է իր բնակության վայրում, որտեղ կատարված զննությամբ հայտնաբերվել են արնանման հետքեր, արնանման հետքերով հագուստներ։
Նախնական տվյալներով՝ հոկտեմբերի 24-ին Լեւոն Հաջյանի բնակարանում անձնական հարցերի շուրջ առաջացել է վիճաբանություն՝ նրա եւ 30-ամյա տղամարդու միջեւ, որի ժամանակ էլ վերջինը դանակով հարվածել է տանտիրոջը։ Կասկածյալը ձերբակալվել է եւ հարցաքննվել դեպքի շուրջ։
Նրան մեղադրանք է առաջադրվել ՀՀ ՔՕ 104-րդ հոդվածի 1-ին մասի հատկանիշներով՝ Սպանություն:
