Չնայած Միջերկրական ծովով Եվրոպայի ափեր հասնել ձգտող միգրանտների թիվը զգալիորեն կրճատվել է, բայց այս տարի նման վտանգավոր նավարկության ժամանակ 3740 մարդ է խեղդվել։ Այս մասին Ժնեւում ճեպազրույցի ժամանակ հայտնել է ՄԱԿ փախստականների հարցերով գերագույն հանձնակատարի վարչության մամուլի քարտուղար Ուիլյամ Սթինդլերը։
Նա հայտնել է, որ 2016-ին Միջերկրական ծովով եվրոպական ափ է հասել 328 հազար միգրանտ։ Նրանցից 3740-ը խեղդվել է վտանգավոր ճամփորդության ընթացքում։ Համեմատության համար նշենք, որ անցած տարի Միջերկրական ծովով Եվրոպա էր հասել ավելի քան մեկ միլիոն միգրանտ։
Սթինդլերը շեշտել է, որ Միջերկրական ծովում այս տարի խեղդվածների գրեթե կեսը Հյուսիսային Աֆրիկայից էին, նրանք փորձում էին Իտալիա հասնել։ Ողբերգական դեպքերի մեծ մասը պայմանավորված է նրանով, որ մաքսանենգները օգտագործում են հին ու նման նավարկությունների համար անպիտան նավեր։ Որոշ դժբախտ պատահարներ էլ եղանակային վատ պայմանների պատճառով են տեղի ունեցել։