Արմավիրի մարզում վրաերթի ենթարկված 52-ամյա տղամարդը սուտ հաղորդում էր տվել, թե մարմնական վնասվածքը ստացել է հարբած ժամանակ ընկելու հետեւանքով:
Ինչպես հայտնում են ոստիկանության լրատվական ծառայոթյունից, հոկտեմբերի 17-ին, ժամը 23.30-ին, հիվանդանոցից ոստիկանության Արմավիրի բաժնում հաղորդում էր ստացվել, որ «աջ սրունքի պրոքսիմալ մետաէպիֆիզի փակ ներհոդային կոտրվածք՝ տեղաշարժով, ստորին ծնոտի սալջարդ և պատռված վերք» ախտորոշմամբ իրենց մոտ է տեղափոխվել 52-ամյա Լևոն Կ.-ն: Նա ոստիկաններին հայտնել էր, որ վնասվածքները ստացել է Ջանֆիդա գյուղում հարբած վիճակում մայթեզրի սալիկների վրա վայր ընկնելու հետևանքով:
Ոստիկանների ձեռնարկված միջոցառումների շնորհիվ հոկտեմբերի 25-ին պարզվել է, որ Լևոն Կ.-ին նշված գյուղում վրաերթի է ենթարկել 47-ամյա Մասիս Պ.-ն՝ «Օպել-Վաուքսհալլ» մակնիշի ավտոմեքենայով:
Նախապատրաստված նյութերն ուղարկվել են քննչական վարչություն:
