Եվրասիական տնտեսական միությունը Եվրամիությունից կառուցողական արձագանք է ակնկալում հարաբերությունների կարգավորման առաջարկին: «ՌԻԱ Նովոստի»-ի փոխանցմամբ՝ այս մասին հայտարարել է Ռուսաստանի ԱԳ փոխնախարար Վասիլի Նեբենզյան՝ ելույթ ունենալով չորեքշաբթի Մինսկում տեղի ունեցած միջազգային համաժողովում:
«Մենք Եվրամիությանը վաղուց ենք կոչ արել համատեղ աշխատել միասնական տնտեսական տարածք ստեղծելու ուղղությամբ: Նախկինի պես Եվրահանձնաժողովից կառուցողական արձագանք ենք ակնկալում ԵՏՄ եւ ԵՄ հարաբերությունների կարգավորման առաջարկին: Դեռեւս պատասխան չենք ստացել Բրյուսելում բարձր մակարդակով միջազգային կոնֆերանս անցկացնելու առաջարկին՝ մեր ինտեգրացիոն միավորումների գործունեության համաձայնեցման եւ միակցման նպատակով»,- նշել է փոխնախարարը:
Դրա հետ մեկտեղ նա նշել է ԵՏՄ-ին «զրպարտելու» չդադարող փորձերի մասին: «Առաջին տարին չէ, որ մենք Եվրասիական տնտեսական միությանը զրպարտելու փորձերի ականատեսն ենք դառնում: Ամենատարածված եւ անհեթեթ մեղադրանքներից մեկն այն է, որ ԵՏՄ-ը Ռուսաստանի զավակն է, Խորհրդային Միության վերածնման նորահայտ տեխնոլոգիա»,- ասել է փոխնախարարը:
«Մինչդեռ ԵՏՄ-ը, որն արդեն երկու տարի հաջողությամբ գործում է, ուղղված է տնտեսական ինտեգրման կոնկրետ խնդիրների լուծմանը»,- նշել է նա:
Նեբենզյան հիշեցրել է, որ ԵՏՄ-ը 15 երկրների հետ առեւտրի ազատ գոտի ստեղծելու վերաբերյակ համաձայնագիր է պատրաստում: