Կառավարության ծրագրում որոշակի մոտեցում չկա աշխատատեղերի ստեղծման հարցում։ Այս մասին հոկտեմբերի 26-ին ԱԺ–ում ասել է պատգամավոր Խաչատուր Քոքոբելյանը։
Պատգամավորի խոսքով՝ կառավարության ծրագրում միաժամանակ նշված է, որ գործադիրը պետք է յուրաքանչյուր քաղաքացու համար արժանավայել կյանք ապահովի։ «Ակնհայտ է, որ արժանավայել կյանքի համար արժանավայել աշխատավարձ է պետք։ Ինձ հետաքրքրում է, թե Կառավարությունը ինչ մոտեցումներ ու տեսլական ունի 6-ամսյա ժամկետում նոր աշխատատեղեր ստեղծելու հարցում, եւ ինչ մոտեցումներ կան աշխատավարձերի բարձրացման համար։ Հենց ցածր աշխատավարձն է կոռուպցիոն ռիսկեր ստեղծում»,– նշել է Քոքոբելյանը։
Դրան ի պատասխան ՀՀ վարչապետ Կարեն Կարապետյանը ասաց, որ Կառավարության ծրագրում հստակ նշված են արդար եւ հավասար պայմանների ապահովման միջոցով աշխատատեղեր ստեղծելու մոտեցումները։ «Կզարգանա բիզնեսն ու ձեռներեցությունը, որը աշխատատեղեր է ստեղծում։ Բացի այդ, մենք նաեւ խոսել ենք հարկային արտոնությունների, էներգիայի արտոնյալ սակագների մասին։ Ամբողջ ծրագիրն ուղղված է բիզնեսի զարգացմանը, բիզնեսի համար ազատ պայմաններ ստեղծելուն։ Եթե դա տեղի ունենա աշխատավարձերի բարձրացումն ավտոմատ կլինի։
Ներդրումներ ներգրավելը 6 ամսից արդյունք ցույց չի տա։ Հաշվի առնելով նախընտրական շրջանը՝ մենք ընտրողների կողմից պասիվություն ենք սպասում։ Եվ երրորդ հերթին՝ շատ երկրներում կան կառավարության ծրագրեր, որոնցում առհասարակ թվեր չկան։ Դրանք ասում են, թե որակապես ուր են գնում, եւ ժամանակը ցույց կտա, թե ինչ կլինի դրա արդյունքում։ Եթե Կառավարության ծրագրում թվեր չկան, դա դեռ չի նշանակում, որ այն վատն է»,– եզրափակեց վարչապետը։