Վենեսուելայի ՆԳ նախարար Նեստոր Ռեվերոլը հայտարարել է ընդդիմության բողոքի ակցիայի ժամանակ փոխհրաձգության հետեւանքով մեկ ոստիկանի սպանվելու մասին, եւս 2 ոստիկան տուժել է: Այս մասին հաղորդում է ՌԻԱ Նովոստին՝ վկայակոչելով Reuters-ը:
Ընդդիմության առաջնորդ, Միրանդայի նահանգապետ Էնրիկե Կապրիլեսը հայտարարել է, որ հակակառավարական երթի ընթացքում բախումների հետեւանքով ավելի քան 120 մարդ է վիրավորվել:
«Վենեսուելայի գրոհ» կարգախոսով ընդդիմության ակցիան սկսվել է նախագահ Նիկոլաս Մադուրոյի լիազորությունների դադարեցման հարցով հանրաքվեի համար ստորագրահավաքը դադարեցնելու մասին դատարանի կայացրած որոշումից հետո: Ընդդիմադիր խորհրդարանը հայտարարել էր նախագահի կողմից Սահմանադրության խախտման մասին եւ սկսել քննարկել նրա իմփիչմենթի հարցը (չնայած երկրի հիմնական օրենքը գործողությունների նման տարբերակ չի նախատեսում):
Չորեքշաբթի Վենեսուելայի ընդդիմադիր խորհրդարանի ղեկավար Էնրի Ռամոսը հայտարարել էր, որ պատգամավորները կհաստատեն հռչակագիրը, որի համաձայն՝ նախագահ Մադուրոն պաշտոնից հեռացված կհայտարարվի: «Ժողովրդավարական միասնության կլոր սեղան» ընդդիմադիր դաշինքի գլխավոր քարտուղար Խեսուս Տորեալբան էլ հայտարարել էր հոկտեմբերի 28-ին 12-ամյա համընդհանուր գործադուլի ծրագրերի մասին: