Ազգային ժողովի ՀՀԿ խմբակցության պատգամավոր, գեներալ Մանվել Գրիգորյանը կարծում է, որ Հոկտեմբերի 27-ի պատվերը եղել է դրսից:
«Թշնամու ձեռքի գործ էր, որ վնասեցին մեզ, մեր անկախությանը: Սպանությունը բացահայտված ա, հայի ձեռով թշնամիների ծրագրերն իրականացվեցին: Վազգենին ֆիզիկապես սպանեցին, որպես մարդ չէին կարող սպանել»,- այսօր` հոկտեմբերի 27-ին, Եռաբլուրում լրագրողների հետ զրույցում ասաց ԵԿՄ նախագահը:
Մանվել Գրիգորյանը կրկին ընդգծեց, որ դատավարության ժամանակ էլ պարզ դարձավ, որ ոճրագործության համար մեղադրվողները դրսում են պատրաստվել, հետեւաբար չի բացառվում` դրսից պատվեր ունեցած լինեին:
Հիշեցնենք, որ 17 տարի առաջ` հոկտեմբերի 27-ին, ոճրագործների խումբը` Նաիրի Հունանյանի գլխավորությամբ, ներխուժեցին Հայաստանի Ազգային ժողովի նիստերի դահլիճ եւ դիմահար կրակոցներով սպանեցին կառավարության եւ խորհրդարանի անդամներին:
Ահաբեկչության զոհ դարձան երկրի վարչապետ, Սպարապետ Վազգեն Սարգսյանը, խորհրդարանի նախագահ Կարեն Դեմիրճյանը, ԱԺ փոխնախագահներ Յուրի Բախշյանն ու Ռուբեն Միրոյանը, օպերատիվ հարցերի նախարար Լեոնարդ Պետրոսյանը, խորհրդարանի պատգամավորներ Արմենակ Արմենակյանը, Հենրիկ Աբրահամյանը եւ Միքայել Քոթանյանը:
Ահաբեկիչների նկատմամբ դատավարությունը տեւեց 2001-2003 թվականները: 6 ահաբեկիչները, այդ թվում` նրանց ղեկավար Նաիրի Հունանյանը, նրա եղբայր Կարեն Հունանյանը, նրա քեռին՝ Վռամ Գալստյանը, Դերենիկ Բեջանյանը, Էդիկ Գրիգորյանը եւ Աշոտ Կնյազյանը դատապարտվեցին ցմահ ազատազրկման: Համլետ Ստեփանյանը դատապարտվեց 14 տարվա ազատազրկման:
3 տարի տեւած դատավարությունն այդպես էլ չկարողացավ կամ չցանկացավ վեր հանել ահաբեկչության կազմակերպիչներին եւ մինչ օրս էլ հասարակությունը լուրջ կասկածներ ունի կազմակերպիչների մասով:
