Հոկտեմբերի 21-ին Հայատսնի պաշտպանության նախարար Սեյրան Օհանյանն ընդունել է Հայաստանում Միացյալ Թագավորության արտակարգ եւ լիազոր դեսպան Չարլզ Լոնսդիլին` Հայաստանում Միացյալ Թագավորության ռազմական կցորդ, փոխգնդապետ Ռիդնիգ Ռիդաութի պաշտոնավարման ավարտի եւ ռազմական կցորդի պաշտոնում փոխգնդապետ Սթիվ Ֆիլիպսի նշանակման կապակցությամբ:
ՊՆ մամուլի ծառայությունից NEWS.am-ին հայտնում են, որ Ս. Օհանյանը բարձր է գնահատել Ռ.Ռիդաութի գործունեությունը հայ-բրիտանական ռազմական համագործակցության զարգացման ուղղությամբ` մաղթելով նրան հաջողություններ հետագա ծառայության մեջ: Միաժամանակ, շնորհավորելով փոխգնդապետ Ս. Ֆիլիպսին Հայաստանում ՄԹ ռազմական կցորդի պաշտոնում նշանակվելու կապակցությամբ, ՀՀ պաշտպանության նախարարը համոզմունք է հայտնել, որ նրա պաշտոնավարման ընթացքում հայ-բրիտանական ռազմական համագործակցությունն առավել կընդլայնվի եւ կամրապնդվի:
Հանդիպման ընթացքում քննարկվել են նաեւ երկկողմ ռազմական համագործակցության ընթացիկ խնդիրներ, ինչպես նաեւ տարածաշրջանային անվտանգությանը վերաբերող հարցեր:
