«Սասնա ծռեր» խմբի անդամ Հովհաննես Հարությունյանի վիրավոր ոտքի գույնը սկսել է փոփոխվել: Այս մասին այսօր՝ հոկտեմբերի 27-ին, NEWS.am-ի հետ զրույցում ասաց նրա պաշտպան Հայարփի Սարգսյանը:
«Նրա ոտքից որոշ բեկորներ հեռացրին, բայց բուն վիրահատություն այդպես էլ չիրականացրին: Պարբերաբար վիրահատությունը հետաձգվում էր տարբեր պատճառաբանություններով, հետո էլ հայտարարեցին, որ վիրահատություն անհրաժեշտ չէ: Մեկ ամիսն անցավ, հիմա Հովհաննեսի ոտքի գույնը փոփոխվել է, մգացել է, նա չի կարողանում աջ ոտքը դնել գետնին, տեղաշարժվում է հենակների օգնությամբ»,-ասաց նա:
Հովհաննես Հարությունյանը վիրավորվել էր ոտքից: Նրա փաստաբանն ահազանգում է, որ «Դատապարտյալների հիվանդանոց» քրեակատարողական հիմնարկում պատշաճ բուժօգնություն չի ցուցաբերվում: