Հայաստանի նախագահ Սերժ Սարգսյանն այսօր` հոկտեմբերի 21-ին ընդունել է պաշտոնական այցով Հայաստանում գտնվող Ռուսաստանի Սահմանադրական դատարանի նախագահ Վալերի Զորկինին, ով Երեւանում կմասնակցի նաեւ հոկտեմբերի 22-ին մեկնարկելիք ՀՀ սահմանադրության 15-ամյակին նվիրված միջազգային խորհրդաժողովին:
Նախագահի մամուլի գրասենյակից NEWS.am-ին հայտնում են, որ ըԸնդգծելով հայ-ռուսական հարաբերությունների բարձր մակարդակը` Սերժ Սարգսյանը նշել է, որ այստ տարվա օգոստոսին ՌԴ նախագահ Դմիտրի Մեդվեդեւի առաջին պետական այցը Հայաստան, լրացուցիչ խթան հանդիսացավ բոլոր ոլորտներում այդ հարաբերությունների ամրապնդման ու խորացման համար:
Նա կարեւորել է նաեւ երկու երկրների սահմանադրական դատարանների միջեւ համագործակցությունն ու փորձի փոխանակումը: Սերժ Սարգսյանը նշել է, որ այսօր ՀՀ սահմանադրական դատարանը Հայաստանում ամենազարգացած պետական ինստիտուտներից մեկն է եւ լինելով ընդամենը 15 տարեկան, անցել է դժվարին, բայց պատասխանատու ճանապարհ: Հանրապետության ղեկավարը խոսել է նաեւ 2005թ. Սահմանադրության մեջ կատարված փոփոխությունների մասին, որի շնորհիվ քաղաքացիներին նույնպես հնարավորություն տրվեց դիմել Սահմանադրական դատարան, եւ այժմ
Դատարանն արժանի կերպով պաշտպանում է Հայաստանի քաղաքացիների սահմանադրական իրավունքները:
ՌԴ սահմանադրական դատարանի նախագահ Վալերի Զորկինի խոսքով, Հայաստանում սահմանադրական արդարադատությունը պատվավոր տեղ է զբաղեցնում, ինչի մասին է վկայում նաեւ Երեւանում միջազգային խորհրդաժողովի անցկացումը: Բարձր գնահատելով ՀՀ եւ ՌԴ սահմանադրական դատարանների համագործակցությունը` Վալերի Զորկինն ընդգծել է, որ երկու երկրների դատարանների միջեւ հարաբերությունները հաջողությամբ զարգանում են նաեւ միջազգային ասպարեզում:
