Թմրանյութերի առեւտուր կազմակերպելու մեջ մեղադրվող բրիտանացին հանձնվել է ոստիկանությանը՝ գանգատվելով, որ ամենաորոնվող հանցագործների ցուցակում լինելու բեռը իր համար չափազանց ծանր է, հայտնում է BBC –ն։
53-ամյա Ռոբերտ Ջերարդը Լիվերփուլից հայտնվել է բրիտանական արդարադատությունից թաքնվող անձանց ցուցակում 2014-ի փետրվարին։ Իր փաստաբանի օգնությամբ նա պայմանավորվել է հանդիպել Հանցավորության դեմ պայքարի ազգային գործակալության ներկայացուցիչների հետ Մանչեսթերում, որտեղ էլ հենց նրան ձերբակալել են։ Նրան արդեն առաջադրվել է մեղադրանք կոկաինի մաքսանենգության նպատակով դավադրության մեջ, նոյեմբերին նա պետք է դատարանի առաջ կանգնի։
Նա Բրիտանիայի ամենաորոնվող հանցագործների ցուցակից երրորդ հանցագործն է, որին ձերբակալել են այս շաբաթ, մինչ այդ Իսպանիայում ձերբակալվել էին երեխաների նկատմամբ սեռական բռնությունների մեջ կասկածվող ՄԵթյո Սեմմոնը ու բռնաբարության համար դատապարտված Մոհամեդ Ալամը։
Ջերարդը փախուստի մեջ էր գտնվում 2013-ի հոկտեմբերից ՝ Ռոթերդամի սրճարանում կատարված խուզարկությունից հետո, որը օգտագործվում է որպես թաքստոց թմրադեղերի առեւտրի համար։