Արարատում այսօր՝ հոկտեմբերի 27-ին, ժամկետային զինծառայողի մահվան պատճառ հանդիսացած ավտովթարի դեպքի առթիվ հարուցվել է քրեական գործ: Այս մասին NEWS.am-ը տեղեկանում է ՀՀ քննչական կոմիտեի մամուլի ծառայությունից: 

Նախնական տվյալներով՝ 2016թ. հոկտեմբերի 27-ին՝ ժամը 01-ի սահմաններում, Արարատ քաղաքի բնակիչ, ժամկետային զինծառայող, 19-ամյա  Դավիթ Վարդանյանի վարած «Օպել Աստրա» մակնիշի ավտոմեքենան, Արարատ քաղաքում երթեւեկելիս, դուրս է եկել  ճանապարհի երթեւեկելի մասից, բախվել էլեկտրասյանը, այնուհետեւ՝ հաստաբուն ծառին, ինչի հետեւանքով Դ.Վարդանյանը ստացած մարմնական վնասվածքներից տեղում մահացել է։ Ավտոմեքենայի երեք ուղեւորները՝  20-ամյա Ֆիլիպ Մկրտչյանը, 21-ամյա Ալբերտ Գեւորգյանը եւ անչափահաս՝ 14-ամյա Տ.Գալստյանը  մարմնական վնասվածքներով տեղափոխվել են Արարատ քաղաքի հիվանդանոց: Նույն օրը Ֆ.Մկրտչյանը տեղափոխվել է Երեւան քաղաքի «Էրեբունի» հիվանդանոց:

Դեպքի առթիվ Արարատի քննչական բաժնում հարուցվել է քրեական գործ՝ ՀՀ քրեական օրենսգրքի 242-րդ հոդվածի 2-րդ մասի հատկանիշներով:

Նախաքննության ընթացքում կատարվել է դեպքի վայրի զննություն, նշանակվել դատաբժշկական փորձաքննություններ: Վթարից տուժած երեք անձինք չեն հարցաքննվել. Նրանց առողջական վիճակը թույլ չի տվել մասնակցել քննչական որեւէ գործողություն։

Կատարվում է քննություն, ձեռնարկվում են անհրաժեշտ քննչական գործողություններ՝ վթարի պատճառները պարզելու համար։