Հայաստանում միասնական ընդդիմադիր բեւեռ ձեւավորելու անհրաժեշտություն կա: Այս մասին հոկտեմբերի 28-ին Հայաստանի Ազգային ժողովում կայացած ավանդական ճեպազրույցների ժամանակ հայտարարել է ՀԱԿ խմբակցության ղեկավար Լեւոն Զուրաբյանը:
Նրա խոսքով՝ ընդդիմության միավորման հարցը չի կարող հրապարակային լուծվել: «Նման հարցերը լուծվում են քաղաքականա ուժերի միջեւ բանակցությունների միջոցով: Լուրջ քաղաքական ուժերի կողմից դեռեւս որեւէ արձագանք չի եղել: Չէինք էլ ակնկալում: Բնականաբար, ընդդիմադիր բեւեռ ձեւավորելու խնդիր կա, որը կարող է կրկին երկրում իրավիճակը «սեւ ու սպիտակ» դարձնել»,- նշել է Զուրաբյանը: