Եվրոպական ստարտապ հանրությանը միավորող StartUs Magazine հարթակը անդրադարձել է երեւանյան տեխնոկյանքին եւ այստեղ ստարտափ հիմնելու նրբություններին:
Երեւանն անվանելով նախկին ԽՍՀՄ տարածքի «Սիլիկոնյան հովիտ»՝ հարթակն անդրադարձել է նախկինում այստեղ տեղակայված խոշոր, համամիութենական նշանակության գիտական կենտրոններին եւ դրանց գործունեությանը, ինչպես նաեւ ներկայացրել ներկա երեւանյան տեխնո անցուդարձը՝ այն ստարտափ հիմնելու համար լավագույն քաղաքներից մեկը կոչելով:
«Կովկասյան լեռներում տեղակայված մոտ 1 մլն բնակիչ ունեցող այս փոքրիկ Եվրոպական մայրաքաղաքն անհավանական առաջընթաց է ապրում ձեռներեցության եւ ստարտափային էկոհամակարգի ակտիվացման տեսանկյունից: Ցածր գնահամակարգը, բիզնես սկսելու համար հեշտացված քաղաքականությունը խթանում են ստարտափային կյանքի ակտիվացմանն ու զարգացմանը: Երկրի Խորհրդարանը,նույնիսկ, վերջերս նորաստեղծ տեխնոլոգիական ստարտափերին հարկերից ազատելու մասին օրինագիծ է ընդունել»,- գրում է StartUs Magazine-ը:
Հարթակը նաեւ ինֆոգրաֆիկ ֆորմատով հետազոտություն է ներկայացրել՝ գործող ներդրումային, ակսելերացիոն եւ ինկուբատոր հիմնադրամների, գործող տեխնոլոգիական ընկերությունների եւ հաջողակ ստարտափնրի, ինչպես նաեւ երեւանյան կարեւորագույն ՏՏ իրադարձությունների մասին: