ԵՄ իշխանությունները պահանջում են, որ WhatsApp մեսենջերը դադարեցնի տվյալների փոխանակությունը Facebook –ի հետ, քանի որ այն սպառնալիք է ստեղծում օգտատերերի անձնական տվյալների համար, գրում է The Wall Street Joutnal-ը։

«29 հոդվածի աշխատախումբը, որը զբաղվում է տվյալների պաշտպանության հարցերով, WhatsApp–ի ղեկավարությանը ուղարկել է նամակ, որում անհանգստություն է հայտնում ընկերությունների միջեւ կնքված վերջին համաձայնագրի կապակցությամբ։ Facebook-ը , որը մեսենջերի սեփականատերն է, մուտք է ստացել WhatsApp–ի օգտատերերի հեռախոսահամարներին ու այլ անձնական տեղեկությունների։

ԵՄ իշխանությունները պնդում են, որ մարդիկ չեն համաձայնել նման պայմանի, երբ սկսել են օգտվել ծառայությունից։ Նրանք պահանջում են դադարեցնել տվյալների փոխանակությունը քանի դեռ օգտատերերի համար չի ապահովվել ամբողջական իրավական պաշտպանություն։

ԵՄ աշխատախումբը նույնատիպ պահանջներ ունի նաեւ Yahoo-ի նկատմամբ։ Սեպտեմբերին ընկերությունը ընդունել է, որ տեղի է ունեցել զանգվածային արտահոսք, որը տեղի էր ունեցել դեռ 2014-ին, երբ գողացվել էին 500 մլն օգտատերերի տվյալներ։ Կողոպուտի հետաքննությամբ զբաղվում էր ՀԴԲ-ն։ ԵՄ իշխանությունները Yahoo–ից պահանջել էին արտահոսքի մասին տեղեկացնել բոլոր օգտատերերին ու ներկայացնել զեկույց այն միջոցառումների մասին, որոնք ձեռնարկել են տեղեկությունները պաշտպանելու համար։ Եթե կանոնակարգողը համարի, որ կանոնները խախտվել են, ընկերությանը կարող են տուգանել։