ԱՄՆ Օրեգոն նահանգի բնակչուհին պատահաբար ուրիշի մեքենա է «առեւանգել», բայց վերադարձրել է այն իր սխալի մասին իմանալուց հետո, հայտնում է UPI–ն։
Մեքենայի տիրուհին պատմել է, որ մեքենան իր տան մոտ էր կայանած, դրա համար էլ տեսախցիկը ֆիքսել էր ամեն ինչ։ Տեսագրությունը միանգամից տարօրինակ էր թվացել կնոջը , քանի որ մեքենան առեւանգողը չափից հանգիստ ու անխռով էր թվում, նա առանց թաքնվելու նստել էր Subaru Impreza-ն ու մի քանի րոպե մնացել կայանատեղիում, որտեղ նրան հեշտությամբ կարող էին նկատել։
Մեքենան առեւանգած կինը հաջորդ օրը փորձել է վերադարձնել այն։ Ոստիկանությունում նա բացատրել է , որ պետք է երեկոյան վերցներ իր ընկերուհիներից մեկի Subaru-ն ,բայց շփոթել էր մեքենաները։ Ընդ որում համընկել էին ոչ միայն մեքենաների ապրանքանիշերը ու գույնը, այլեւ բանալիները, այնպես որ կինն իրոք չէր հասկացել, որ ուրիշ մեքենա է նստել։
Նրա ընկերուհին միայն հաջորդ առավոտյան է տեսել բերված մեքենան ու հասկացել, թե ինչ է տեղի ունեցել։ Նա անմիջապես ընկերուհուն տեղեկացրել է ու ասել , ո ր վերադարձնի մեքենան իսկական տիրոջը՝ ներողություն խնդրելով ու գումար ուղարկելով ծախսած վառելիքի համար։
Ոստիկանությունում մեքենայի տիրուհուն բացատրել են, որ Subaru –ի հին մոդելների բանալիները ոչ միշտ են եզակի ու կարող են համընկնել մի քանի մեքենաների։