Ադրբեջանի կողմից ռազմատենչ հայտարարություններն ու պատմական խայտառակ խեղաթյուրումները միանշանակ ուղղված են հայկական լսարանին ահաբեկելու համար, մինչդեռ հակառակ ազդեցությունն են ունենում: Նման տեսակետ է հայտնել ԱԺ Հանրապետական խմբակցության պատգամավոր Արման Սահակյանը (Գալուստ Սահակյանի որդին):
«Բնական է, որ նրանց հետ հնարավոր չէ հույսեր կապել` ստի, կեղծիքի, անտրամաբանության հիմքի վրա հնարավոր չէ ինչ որ չափով շիտակ հարաբերություններ, բանակցություններ, դիվանագիտական գործընթաց ձեւավորել:
Մեր կողմից հստակորեն ասված է, որ, առավել եւս այդքանից հետո հնարավոր չէ Արցախի ժողովրդի որեւէ ենթակայացում իրեն բացարձակապես ոխերիմ թշնամի դրսեւորված պետությանը: Եվ դա արդեն հասկանում է միջազգային հանրությունը»,- նշել է Սահակյանն ու հավելել. «Ակնհայտ է, որ մեր հարեւան պետությունում հողը ավելի բարձր են գնահատում նրա վրա ապրող մարդկանցից: Նրանց պետք է հող` առանց հայերի»:
Նա հիշեցրել է Սերժ Սարգսյանի ձեւակերպումը` «Ադրբեջանին զարմացնում ու զայրացնում է այն, որ միջազգային հանրությունը եւ եռանախագահող երկրների նախագահները հրապարակայնորեն ճանաչում են Արցախի ժողովրդի ինքնորոշման իրավունքը: Ավելին` Արցախի ժողովրդի ազատ կամարտահայտումը Լեռնային Ղարաբաղի քաղաքական կարգավիճակի վերաբերյալ եւ դրա արդյունքները պետք է պարտադիր իրավական ուժ ունենան բոլորի համար: Ադրբեջանական հուսահատական ջղաձգումների մեխը հենց այստեղ է»:
«Մեզ համար Արցախի հարցը այն գլխավոր հարցն է, որտեղ մեր ժողովուրդը առավելագույնս միասնական է, եւ առ այսօր որեւէ ճեղքվածք չի նկատվել այդ կուռ տրամաբանության մեջ:
Արցախը հայ ժողովրդի այն հատվածն է, որ երբեք պարտություն չի կրել: Թող ասեն. այդ ե՞րբ են ռազմական ճանապարհով հաղթել նրան: ՀՀԿ-ն այսօր իր ողջ քաղաքական հեղինակությունն օգտագործելու է` այս հարցում որեւէ շեղում, որեւէ թյուրիմացություն թույլ չտալու համար: Շատ լավ է, որ պատմական ստոր խարդախությունները այսպես շեշտակի բացահայտվում են: Սա այն կետն է, որտեղ մենք ունենք այն ցանկալի միասնությունը, որ երազել ենք բոլոր ժամանակներում»,- ասել է Արման Սահակյանը: