Վանաձորում հոկտեմբերի 24-ին մահացել է ոստիկանության գնդապետի մոր սպանության մեջ մեղադրվող Սլավիկ Ոսկանյանը:
Հայաստանի ԱՆ քրեակատարողական վարչության մամուլի ծառայությունից NEWS.am-ին հայտնում են, որ «Վանաձոր» քրեակատարողական հիմնարկում, քրեական օրենսգրքի 104-րդ հոդվածի 1-ին մասով եւ 175-րդ հոդվածի 2-րդ մասի 4-րդ կետով մեղադրվող, նախնական կալանքում գտնվող Սլավիկ Ժորժիկի Ոսկանյանը (33 տարեկան, նախկինում 3 անգամ դատապարտված) 2010թ. հոկտեմբերի 24-ին հանկարծամահ է եղել: Ըստ բժշկական նախնական ախտորոշման, մահվան պատճառ է հանդիսացել թուք ներարկվելու հետեւանքով առաջացած ձախ ստորին վերջույթի գազային գանգրենան: Հաղորդագրության մեջ չի նշվում, թե արդյոք, քննվո՞ւմ է նաեւ սպանության վարկածը, հատկապես, որ ոչ ոք տեղյակ չի եղել, որ 33-ամյա տղամարդու մոտ գանգրենա է սկսված եղել:
Ինչպես արդեն հայտնել է NEWS.am-ը, հոկտեմբերի 6-ին, ժամը 20.50-ին, շտապ օգնության կայանից ոստիկանության Վանաձորի բաժնում ահազանգ էր ստացվել, որ Զաքարյան փողոցի խանութներից մեկում կնոջ դիակ կա: Դեպքի վայր մեկնած օպերատիվ խումբը Զաքարյան փողոցի 8/11/Ա հասցեում գործող մթերային խանութում հայտնաբերել էր տնօրեն, 59-ամյա Սվետլանա Կազազյանի դիակը` պարանոցի մասում սուր-կտրող գործիքից ստացած կտրած-ծակած վերքի հետքով: Սվետլանա Կազազյանը ոստիկանության գնդապետ Մովսես Իսկանդարյանի մայրն էր:
Հոկտեմբերի 9-ին, ժամը 09.00-ին, ոստիկանության Լոռու մարզային քննչական բաժնից ստացված գրության համաձայն` ոստիկանության Լոռու մարզային վարչության եւ Վանաձորի բաժնի ծառայողների կողմից ձեռնարկված օպերատիվ-հետախուզական միջոցառումների շնորհիվ պարզվել է, որ սպանությունը կատարել է հոկտեմբերի 7-ին այլ հանցագործություն կատարելու համար ձերբակալված, նախկինում երեք անգամ ազատազրկման դատապարտված, 33-ամյա Սլավիկ Ոսկանյանը:
