Ռուսաստանի, Հայաստանի եւ Ադրբեջանի նախագահների՝ այսօր կայանալիք հանդիպումից մեծ սպասելիքներ չարժե ունենալ։ Հոկտեմբերի 27-ին տեղի ունեցած մամուլի ասուլիսի ժամանակ այս մասին հայտարարեց «Նորավանք» հիմնադրամի տնօրեն, քաղաքագետ Գագիկ Հարությունյանը։
Նրա խոսքով, Հայաստանի եւ Ադրբեջանի նախագահների վերջին՝ պետերբուրգյան հանդիպումից 4 ամիս անց, շատ բան է փոխվել։ «Նախ. Ղարաբաղյան խնդրի լուծումը մեծ տերությունները, կարծես թե, հանձնել են Ռուսաստանին եւ դա, կարծես, դարձել է Ռուսաստանի մենաշնորհը։
ՌԴ նախագահի նախաձեռնությամբ` հակամարտող կողմերի ղեկավարների հանդիպումները կարծես օրինաչափություն են դառնում։ Երկրորդ՝ փոփոխություններ են տեղի ունեցել նաեւ տարածաշրջանային մակարդակով։ Դա նախ հայ-ռուսական ռազմավարական պայմանագրի ժամկետի երկարաձգումն է, ապա նաեւ թուրք-ադրբեջանական՝ փոխօգնության վերաբերյալ նոր պայմանգրի կնքումը եւ այլն։ Կա նաեւ զուտ տեղական հոգեբանական տարրը։ Պետերբուրգյան հանդիպման ժամանակ Ալիեւի թույլ տված հայտնի դեմարշը եւ Հայաստանի նկատմամբ դիվերսիոն գործողությունները Ադրբեջանի կողմից լուրջ սխալ էին, ինչն առաջ բերեց ռուսական կողմի տարկուսանքը»,- հիշեցրեց Հարությունյանը։
NEWS.am-ի հարցին, թե հավանակա՞ն է, արդյոք, որ այս հանդիպման ժամանակ Հայաստանի նախագահ Սերժ Սարգսյանը կբարձրացնի հոկտեմբերի 26-ին ղարաբաղա-ադրբեջանական շփման գծում ադրբեջանցիների կողմից սպանված հայ զինվորի հարցը, «Նորավանքի» տնօրենը պատասխանեց. «Իրական զինադադարի հաստատումն այն նախապայմանն է, առանց որի կողմերը դժվար թե առաջ գնան բանակցություններում։ Դիվանագիտական հարթությունում առաջին փաստաթուղթը, որ կողմերը պետք է ստորագրեն, հենց այս խնդրի վերաբերյալ պետք է լինի։ Անշուշտ, նման խնդիրներ այնտեղ քննարկվելու են»:
Ամփոփելով՝ նա նշեց, որ ղարաբաղյան հակամարտության բանակցությունների արդյունքներով, հայկական կողմը դիրքային առումով առավելություն ունի Ադրբեջանի նկատմամբ։ «Մեր դիրքերն ավելի լավ են նայվում»,- շեշտեց Հարությունյանը։