Եվրախորհրդարանի պատգամավորներ Դանիեն Աբադը եւ Միշել Ռեվազին Եվրոպական ժողովրդական կուսակցության փորձագետ Նիկոլաս Զիլբերգլայդի եւ Հայ դատի Եվրոպական կոմիտեի ղեկավար Հիլդա Չոբոյանի, ինչպես նաեւ Հայաստանի Ազգային ժողովի պատգամավորների ուղեկցությամբ հոկտեմբերի 29-ին այցելել են Ծիծեռնակաբերդ։ Հայոց ցեղասպանության զոհերի հուշահամալիրին ծաղիկ դնելուց հետո նրանք եղել են Ցեղասպանության թանգարան-ինստիտուտում։
Լրագրողների հետ զրույցում Միշել Ռեվազին նշել է, որ այցը Լեռնային Ղարաբաղ եւ Հայաստան կազմակերպվել է Եվրոպայում հայկական կազմակերպության կողմից։ «Մենք այստեղ տեսանք, որ իրավիճակը շատ փխրուն է։ Եվրոպայից շատ դժվար է իրավիճակին ճիշտ գնահատական տալ, քանի որ Հարավային Կովկասը՝ Հայաստանը, Վրաստանը եւ Ադրբեջանը շատ հեռու են, դրա համար էլ ճիշտ գնահատականի համար այս այցը կազմակերպեցինք»։
Պատասխանելով NEWS.am-ի հարցին, թե ինչպե՞ս են գնահատում Աստրախանի եռակողմ հանդիպումը, Ռեվազին ասաց. «Հանդիպումները շատ կարեւոր են։ Լուծում կարելի է գտնել այն դեպքում, եթե այն գոհացնում է բոլոր կողմերին՝ Հայաստանին, Ադրբեջանին, Ռուսատանին եւ իհարկե Լեռնային Ղարաբաղին, որը պարտադիր պետք է ներգրավվի բանակցային գործընթացի մեջ։ Բայց ամենակարեւորն այն է, որ կողմերից յուրաքանչյուրը քայլ անի։ Հանդիպումների միջոցով կարելի է լուծում գտնել»։