Հոկտեմբերի 29-ին Հայաստանի ԱԺ նախագահ Հովիկ Աբրահամյանն ընդունել է Եվրոպական Խորհրդարանի պատգամավորներ Միշել Ռիվազիին եւ Դամիեն Աբադին:
ԱԺ մամուլի ծառայությունից NEWS.am-ին հայտնում են, որ Հովիկ Աբրահամյանը նշել է, որ եվրոպական եւ միջազգային կառույցներում զգացվում է Հայաստանի եւ ԼՂ հիմնախնդրի վերաբերյալ ճշգրիտ տեղեկատվության պակաս եւ այս առումով նման այցերն էլ ավելի կարեւոր են դառնում, քանի որ դրանք հնարավորություն են ընձեռում անմիջականորեն ծանոթանալ իրականությանը, ընթացող զարգացումներին, ստանալ օբյեկտիվ տեղեկատվություն, ինչը կնպաստի անկողմնակալ մոտեցում դրսեւորելուն:
Հյուրերի խնդրանքով նա մանրամասն ներկայացրել է ԼՂ խնդրի պատմությունը եւ կարգավորման գործընթացը: ԱԺ նախագահը եւս մեկ անգամ շեշտել է, որ Հայաստանը հիմնախնդրի կարգավորումը տեսնում է միայն ԵԱՀԿ Մինսկի խմբի շրջանակում` հիմնված ազգերի ինքնորոշման, տարածքային ամբողջականության եւ ուժի չկիրառման սկզբունքների վրա: Հովիկ Աբրահամյանը խիստ մտահոգիչ համարեց այն փաստը, որ Ադրբեջանի կողմից հաճախակի խախտվում է զինադադարը, ինչը մարդկային զոհերի պատճառ է դառնում եւ որեւէ կերպ չի նպաստում տարածաշրջանային անվտանգությանը եւ խաղաղության հաստատմանը: Նա ցավով արձանագրեց, որ միջազգային հանրությունը համարժեք գնահատական չի տալիս Ադրբեջանի նման գործելաոճին:
Եվրախորհրդարանի պատգամավորներ Միշել Ռիվազին եւ Դամիեն Աբադը շեշտել են, որ իրենց համար չափազանց կարեւոր էր այցը Հայաստան եւ ԼՂՀ, քանի որ անմիջական պատկերացում ստացան տարածաշրջանային իրավիճակի վերաբերյալ: Նրանք անընդունելի համարեցին Հայաստանին` տարածաշրջանային ծրագրերից մեկուսացնելու փորձերը, ինչը խոչնդոտում է տարածաշրջանային համապարփակ զարգացմանը, ինչպես նաեւ կարեւորեցին Հայաստանի էներգետիկ անվտանգությունը:
Տպավորված լինելով Լեռնային Ղարաբաղ իրենց այցելությունից` պարոն Աբադը ասաց. «Ինձ ցնցեց, որ Ղարաբաղում ապրող ժողովուրդ կա, որ այնտեղ գործում են պետական կառույցներ եւ ժողովրդավարական ինստիտուտներ»:
Եվրախորհրդարանի պատգամավորների կարծիքով արցախյան հիմնախնդրին առավել մոտիկից ծանոթանալու համար կարեւոր են նման այցերը, քանի որ Եվրախորհրդարանի պատգամավորներից շատերը լավ պատկերացում չունեն Կովկասյան տարածաշրջանի խնդիրների մասին: Այս առումով նրանք ցանկալի համարեցին ԼՂՀ ԱԺ նախագահի այցը Եվրախորհրդարան:
Հանդիպման ընթացքում անդրադարձ եղավ հայ-թուրքական հարաբերություններին, Եվրախորհրդարան-ՀՀ ԱԺ համագործակցության հեռանկարներին եւ երկկողմ կարեւորություն ունեցող այլ հարցերի եւս: