Հայաստանյան Կարմիր Խաչը կազմ ու պատրաստ է ադրբեջանական կողմի հետ գերիների փոխանակման գործողություններ սկսելուն. հարկավոր է միայն, որ այդ մասին իրենց տեղեկացնեն։ NEWS.am-ի թղթակցի հետ զրույցում այս մասին նշեց Կարմիր խաչի միջազգային կոմիտեի (ԿԽՄԿ) հաղորդակցման ծրագրերի ղեկավար Աշոտ Աստաբացյանը:
«Մեր դերն այս հարցում չեզոք միջնորդի դերն է։ Մենք անկախ հումանիտար կազմակերպություն ենք, որն ունի մանդատ եւ չեզոք միջնորդի կարգավիճակ: Ավելին այս պահին ասել չեմ կարող»,- շեշտեց նա՝ միաժամանակ ավելացնելով, որ չի կարող նշել անգամ փոխանակման գործողությունների մոտավոր ժամկետները։
Նշենք, որ Հայաստանի եւ Ադրբեջանի նախագահներ Սերժ Սարգսյանն ու Իլհամ Ալիեւը հոկտեմբերի 27-ին Աստրախանում կայացած եռակողմ հանդիպման արդյունքներով պայմանավորվել են ռազմագերիների եւ զոհվածների դիակների փոխանակում իրականացնել:
Ներկայումս Ադրբեջանում են գտնվում 6 հայ ռազմագերի եւ մեկ ընտանիք՝ բաղկացած 5 անձից: Կարմիր խաչի միջազգային կոմիտեի (ԿԽՄԿ) հաղորդակցման ծրագրերի ղեկավար Աշոտ Աստաբացյանը NEWS.am-ի թղթակցի հետ զրույցում հայտնեց, որ Ադրբեջանի տարածքում են գտնվում Եղիշե, Ռուզաննա, Ալֆրեդ, Գայանե եւ Պետրոս Գեւորգյանները, որոնք անցել են ադրբեջանական սահմանը այս տարվա հունվարին:
Ադրբեջանական գերության մեջ են գտնվում նաեւ զինծառայողներ Հրանտ Մարկոսյանը, Ալիկ Թեւոսյանը, Արթուր Սարգսյանը, Օհան Հարությունյանը, Գեւորգ Թովմասյանն ու Կարեն Հարությունյանը:
Աստաբացյանը նշեց նաեւ, որ Հայաստանում գտնվում են ադրբեջանցի 2 ռազմագերի եւ քաղաքացիական մեկ անձ: Կարմիր Խաչի ներկայացուցիչը, սակայն, չնշեց ադրբեջանցիների անունները՝ հայտնելով, որ դա կազմակերպության սկզբունքն է, եւ իրենք իրավունք չունեն հայտնել այդ անձանց անունները:
Ադրբեջանական լրատվամիջոցների պնդմամբ, Հայաստանում են գտնվում զինծառայողներ Անար Հաջիեւն ու Ռոման Հուսեյնովը, նաեւ 47-ամյա Էլդար Թագիեւը:
