Հունաստանում ավարտվեց շախմատի աշխարհի պատանեկան առաջնությունը: Մինչեւ 18 տարեկանների պայքարում աշխարհի փոխչեմպիոնի կոչումը նվաճեց հայաստանցի գրոսմայստեր Սամվել Տեր-Սահակյանը:
Մինչեւ վերջին տուրը Տեր-Սահակյանը պահպանում էր ոսկե մեդալը նվաճելու հնարավորությունը, սակայն վերջին տուրում նա պարտվեց ռուսաստանցի Ալեքսանդր Շիմանովին, իսկ հիմնական մրցակից, ամերիկացի Սթիվեն Զիրկը հաղթեց ադրբեջանցի Վասիֆ Դուրարբեյլիին:
Զիրկը 9,5 միավորով գրավեց առաջին տեղը, իսկ Տեր-Սահակյանը 8,5 միավորով երկրորդն է: Շիմանովը Տեր-Սահակյանի նկատմամբ տարած հաղթանակի շնորհիվ նվաճեց բրոնզե մեդալը: