Լեհաստանի նախագահ Բրոնիսլավ Կոմորովսկին սիրով ընդունել է Սերժ Սարգսյանի հրավերը եւ 2011 թվականին կայցելի Հայաստան: Այս մասին նա նշել է Վարշավայում Հայաստանի Ազգային անվտանգության խորհրդի քարտուղար Արթուր Բաղդասարյանի գլխավորած պատվիրակության հետ հանդիպման ժամանակ: Հենց Ա. Բաղդասարյանն էլ Կոմորովսկուն է փոխանցել Սերժ Սարգսյանի հրավերը:
Ինչպես NEWS.am-ը տեղեկանում է ԱԱԽ քարտուղարի մամուլի ծառայությունից, Արթուր Բաղդասարյանը շնորհակալություն է հայտնել Լեհաստանի նախագահին` Հայոց ցեղասպանությունը ճանաչելու, ԼՂ հակամարտության կարգավորման գործընթացում հավասարակշռված դիրքորոշում ցուցաբերելու համար: Նշելով, որ հայերը դարեր շարունակ մեծ ներդրում ունեն Լեհաստանի մշակութային, տնտեսական կյանքում` Բրոնիսլավ Կոմորովսկին հավելել է, որ ցեղասպանությունների դատապարտումը կարեւոր է դրանց հետագա կրկնությունը բացառելու առումով, որ 21-րդ դարում կարեւոր են խաղաղության եւ փոխգործակցության վրա խարսխված հարաբերությունները:
Լեհաստանի նախագահը պատրաստակամություն է հայտնել աջակցել ԵՄ-Հայաստան համագործակցության շրջանակում Հայաստանում իրականացվող բարեփոխումների գործընթացին, կարեւորվել է «Արեւելյան գործընկերության» ծրագիրը, որում ընդգրկված է նաեւ Հայաստանը: